Pesalem 75:1-10

¹O Anôtô, aêac aweŋ gêôc aôm. O Anôtô, aêac alanem aôm. Aêac asôm aôm waem lasê ma awa gêŋtalô samob, taŋ aôm gôgôm naŋ sa.

²Anôtô kêsôm gebe “Aê kakêŋ ŋoc noc mêtôcŋa ma oc jamêtôc biŋ naêndêŋgeŋ.

³Embe nom êkôtiŋ tau ma ŋamalac samob, taŋ sêŋgôŋ nom naŋ têtênêp, go aê jandeŋ nom ŋanombaŋ tôŋ.

⁴Aê aoc ênac tetoc tauŋ sawaga gebe ‘Atoc taôm-sa atom.’ Ma êndêŋ lau alôb-alôbwaga gebe ‘Asa môkêmapac sa amboac secgeŋmaŋ.

⁵Asa môkêmapac sa ŋanôgeŋ amboac tonaŋ atom. Amêtôc gêsômtêkwa êtu baliŋ alanem taômgeŋ atom.’”

⁶Mêtôcwaga oc mêŋêsa aŋga oc kêpiŋa ma aŋga oc kêsêpŋa atom ma êmêŋ aŋga gamêŋ gêmu kêpi to gêmu kêsêpŋa atom amboac tonaŋgeŋ.

⁷Anôtô oc êmêtôc biŋ êmoa. Eŋ oc êkôniŋ lau teŋ tôŋ me etoc lau teŋ sa.

⁸Apômtau lêma kêkam laclu teŋ, taŋ ênê têtac ŋandaŋ ŋawain ŋajaŋa kêpoac naŋ. Eŋ kêkêc kêsêp laclu ma lau alôb-alôb sêlib ŋatetep samob gêwiŋ.

⁹Ma aê oc ôlic api toôndugeŋ ŋapaŋ gabe aoc aôc Jakobnê Anôtô.

¹⁰Eŋ asap lau sec samob, taŋ sêkac tauŋ su aŋga Anôtônê naŋ, naŋ ŋaclai tulu. Eŋ êkiaŋ lau gêdêŋ nêŋ ŋaclai sa êtu kapôêŋ.