Sam 75:1-10

¹(Keke kinera te Asapa) Zama leana koa Goi si gami, kei Tamasa, zama leana koa Goi si gami, sina koa tata si Goi koa gami, meke tozi vura nia gami sari na Mua tinavete variva magasadi.

²“Ele pada vekoa Rau sa totoso varipitui,” gua sa Tamasa, “Meke kaqu varipitui va toṉoto ni Rau sari na tie.

³Be tava holoqoru sari tiṉitoṉa toadi pa pepeso, meke tava niniu sa popoa pepeso, ba Arau sina vina nabuna sa sinokirae.

⁴Tozi ni Rau saripu vahesi pule ni, ‘Mu lopu vahesi pule ni gamu,’ meke koari na tie kaleadi si zama si Rau,

⁵‘Mu lopu vahesi puleni gamu koari na mia ṉiniraṉira.’ ”

⁶Sa vinaripitui si lopu mae guana pa kali gasa rimata ba be pa lodu rimata; lopu pa kali gede ba be pa kali matao.

⁷E Tamasa tu si varipitui ni sari na tie, meke Asa tu vizatia sapu esei si tava lavata, meke esei si tava gore palae,

⁸Taṉinia e Zihova pa Limana si keke kapa sapu siṉia vaeni ṉiṉirana sapu sa Nana binugoro. Zoropo nia Sa si asa, meke napoa rina tie kaleadi, meke va paho hokaria rini si asa.

⁹Ba arau si lopu kaqu makudo kera vahesia sa Tamasa te Zekopi qetuqetu nia si Asa ninae rane.

¹⁰Kaqu huaria Sa sa ṉiniraṉira tadi na tie kaleadi, ba sa ṉiniraṉira tadi na tie toṉoto si kaqu ta ovulu sage.