51يّتّ عِفبٌي ﭑ مَيٍلٍمَ نّ، كْنْ ﭑ مُ عِ شَ سّرِيّ كِرَ بّحِنمَ.
52عَلَتَلَ، ﭑ تٌ ﭑ نَتُ عِ شَ كِيتِ تِنشِنشِيٍ مَ عِ نَشَن سَشِ تّمُي دَنفِشِ، ﭑ بْحّ لِمَنِيَمَ نّ.
53ﭑ بْحّ تٍشِ عَ حَاشِ رَ تِنشِنتَرٍيٍ شِلِ مَ نَشٍيٍ عِ شَ سّرِيّ رَبٌلٌمَ.
54ﭑ سَبَتِ دّدّ، ﭑ بّيتِ بَمَ نّ عِ شَ يَامَرِيٍ شَ قٍ رَ.
55كْي رَ ﭑ نَ ﭑ نَتُمَ نّ عِ شِلِ مَ. عَلَتَلَ، ﭑ قَمَ نّ عِ شَ سّرِيّيٍ رَتِنمّدٍ.
56ﭑ دَرِشِ عِ سَفٌ رَبَتُقٍ نَن نَ.
57عَلَتَلَ، عِ تِدٍ فبٌ ﭑ بّ. ﭑ بَرَ لَايِدِ تٌنفٌ عِ شَ مَسٍنيِ رَبَتُقٍ رَ.
58ﭑ وَ مَ لُقٍ عِ سّيتِ مَ ﭑ بْحّ بِرِن نَ. هِننّ ﭑ نَ عَلْ عِ عَ مَسٍن كِ نَشّ.
59ﭑ تٌ ﭑ حّرّ كِ مَتٌ، ﭑ بَرَ فبِلٍن عِ شَ مَسٍنيِ مَ.
60ﭑ فبَتَمَ نّ، ﭑ مُ دُفُندِ مَ عِ شَ يَامَرِيٍ رَبَتُقٍ رَ.
61هَلِ مِشِ حَاشِيٍ كَنكَن ﭑ مَ، ﭑ مُ نّيمُمَ عِ شَ سّرِيّيٍ مَ.
62كْي تَفِ، ﭑ كٍلِمَ نّ، ﭑ عِ مَتْشْ عِ شَ كِيتِ تِنشِنشِ شَ قٍ رَ.
63عِ يَرَفَاشُي بِرِن قِندِشِ ﭑ حّرّبٌورٍ نَن نَ، نُن نَشٍيٍ عِ سَفٌ رَبَتُمَ.
64عَلَتَلَ عِ شَ شَنُنتٍيَ نَ دُنِحَ بِرِن مَ، ﭑ شَرَن عِ شَ يَامَرِيٍ رَ.
65عَلَتَلَ، عِ بَرَ قٍ قَنيِ رَبَ ﭑ تَن عِ شَ كٌنيِ بّ، عَلْ عِ عَ لَايِدِشِ كِ نَشّ.
66ﭑ شَرَن قٍ تَفِ رَ سَدٍ نُن قٍ كٌلٌنيِ رَ، بَرِ مَ ﭑ لَشِ عِ شَ يَامَرِيٍ رَ.
67ﭑ نُ بَرَ لْي بٍيمَنُ عِ شَ ﭑ مَ قٍ مَفٌرٌ، كْنْ يَكْسِ قَ ﭑ نَ عِ شَ مَسٍنيِ نَن نَبَتُقٍ.
68عِ قَن، عِ قٍ قَنيِ رَبَمَ، ﭑ شَرَن عِ شَ يَامَرِيٍ رَ.
69هَلِ يّتّ عِفبٌي وُلٍ سَمَ ﭑ شُن، ﭑ عِ شَ يَامَرِيٍ رَبَتُمَ نّ ﭑ بْحّ بِرِن نَ.
70عٍ بْحّ شْرْشْ عَلْ فّمّ، كْنْ عِ شَ سّرِيّ حْشُن ﭑ بّ.
71ﭑ مَ تْورّ بَرَ ﭑ مَلِ عِ شَ يَامَرِيٍ كٌلٌنقٍ رَ.
72عِ شَ مَسٍنيِ قَن ﭑ بّ شّيمَ نُن فبٍتِ رَ.
يَبُرَ 119
يَبُرَ 119:51-72