Zebur 119:51-72

⁵¹Tekebburlar esheddiy haqaretligini bilen, Lékin Tewrat-qanunungdin héch chetnimidim.

⁵²Qedimde békitilgen hökümliringni yadimgha keltürdüm, i Perwerdigar, Shundaq qilip özümge teselli berdim.

⁵³Tewrat-qanunungni tashliwetken reziller wejidin, Otluq ghezep mende qaynap tashti.

⁵⁴Musapir bolup turghan jayimda, Körsetmiliring méning naxshilirim boldi.

⁵⁵Kéchide, i Perwerdigar, namingni eslep yürdum, Tewrat-qanunungni tutup keldim.

⁵⁶Men buninggha nésip boldum, Chünki men körsetmiliringke itaet qilip keldim.

⁵⁷|ח| (Xet) Özüng méning nésiwemdursen, i Perwerdigar; «Séning söz-kalamingni tutay» — dédim.

⁵⁸Men pütün qelbim bilen didaringgha intilip yélindim; Wedeng boyiche manga shapaet körsetkeysen.

⁵⁹Men yolliring üstide oylandim, Ayaghlirimni agah-guwahliqliringgha qaritip buridim.

⁶⁰Men aldiridim, héch kéchikmidim, Séning emrliringge emel qilishqa.

⁶¹Rezillerning asaretliri méni chirmiwalghini bilen, Men Tewrat-qanunungni héch untumidim.

⁶²Heqqaniy hökümliring üchün, Tün kéchide teshekkür éytqili qopimen.

⁶³Men Sendin qorqidighanlarning, Körsetmiliringge egeshkenlerning hemmisining ülpitidurmen.

⁶⁴Jahan, i Perwerdigar, Séning özgermes muhebbiting bilen toldi; Manga belgilimiliringni ögetkeysen.

⁶⁵|ט| (Tet) Söz-kalaming boyiche, i Perwerdigar, Öz qulunggha méhribanliqni körsitip kelgensen.

⁶⁶Manga obdan perq étishni we bilimni ögetkeysen; Chünki men emrliringge ishendim.

⁶⁷Men azabqa uchrashtin burun yoldin azghan, Biraq hazir sözüngni tutimen.

⁶⁸Sen méhribandursen, méhribanliq qilisen, Manga belgilimiliringni ögetkeysen.

⁶⁹Tekebburlar manga qara chaplashti; Biraq körsetmiliringge pütün qelbim bilen itaet qilimen.

⁷⁰Ularning qelbi tuymas bolup ketti; Biraq men bolsam Tewrat-qanunungni xursenlik dep bilimen.

⁷¹Azabqa uchrighinim yaxshi boldi, Shuning bilen belgilimiliringni ögendim.

⁷²Men üchün aghzingdiki qanun-telim, Minglighan altun-kümüsh tenggidin ewzeldur.