ВЫСЛОЎІ 28:3-20

³Чалавек бедны і прыгнятальнік слабых тое самае, што праліўны дождж, які змывае хлеб.

⁴Адступнікі ад закона хваляць бязбожных, а тыя, што трымаюцца закона, абураюцца імі.

⁵Злыя людзі не разумеюць справядлівасьці, а шукальнікі Госпада разумеюць усё.

⁶Лепш бедны, які ходзіць у сваёй беззаганнасьці, чым той, хто выкручвае шляхі свае, хоць ён і багаты.

⁷Хто захоўвае закон - сын разумны, а хто водзіцца з марнатраўцамі, той уводзіць у сорам бацьку свайго.

⁸Хто памнажае маёмасьць сваю ростам і ліхвою, той зьбірае яе дабрачынцам бедных.

⁹Хто ўхіляе вуха сваё, каб ня слухаць закону, у таго і малітва - мярзота.

¹⁰Хто зводзіць праведных на дарогу зла, сам упадзе ў сваю яму; а беззаганныя спадкуюць дабро.

¹¹Чалавек багаты - мудрэц у вачах сваіх, але разумны бядняк бачыць яго наскрозь.

¹²Калі трыумфуюць праведнікі, вялікая слава; але калі ўзвышаюцца бязбожныя, людзі хаваюцца.

¹³Той, хто хавае свае злачынствы, ня будзе мець посьпеху; а хто прызнаецца і пакідае іх, той будзе памілаваны.

¹⁴Шчасны чалавек, які заўсёды ў страху Божым; а хто робіць жорсткім сэрца сваё, той трапляе ў бяду.

¹⁵Як рыклівы леў і галодны мядзьведзь, так бязбожны валадар над бедным народам.

¹⁶Неразумны валадар шмат чыніць крыўды; а той, які ненавідзіць карысьлівасьць, падоўжыць дні.

¹⁷Чалавек вінаваты ў крыві чалавечай, будзе ўцякаць да сьмерці, каб хто не схапіў яго.

¹⁸Хто ходзіць беззаганна, той будзе ўратаваны; а хто ходзіць крывымі дарогамі, упадзе на адной зь іх.

¹⁹Хто ўрабляе зямлю сваю, той будзе есьці хлеб; а хто пераймае гультаёў, таго накорміць галеча.

²⁰Верны чалавек багаты на дабраславеньні; а хто сьпяшаецца разбагацець, той не застанецца без пакараньня.