Ŋicwofuŋ I 8:19-44

¹⁹Erâ sifu go gahac mi bazemec. Aricne, ŋokâge moc fua‐gareocmu eki ʒâŋe biŋe‐nanere fic moc fuaocte bazejec.’

²⁰Eme Wofuŋzi dâŋ muwec irec fârine bâfuawec wâc. No mamac‐nane Dawidi âkehockehuc Israere eri ŋeŋeo ŋekopac. I Wofuŋzi muwec irec sâc fuawec. Eme no Wofuŋ, Israere Anutu ere ʒâŋe biŋe fuaocte ufuŋ moc bapo hâcne.

²¹Eme Wofuŋzi mamacfâc‐nâŋec Aigita mâreŋkonec jowac‐jopa wahahuc jaŋehec ʒâʒâfic ewec ʒâʒâfic katapa irec ŋeŋe hae moc bâfuakopac hâcne.”

²²Eme Salomo e Wofuŋte alata irec maŋfuŋko Israe kikefuŋ jaŋere maio domahuc meticne sambâŋkopec bafaharehuc qaratiewec.

²³Ehuc ʒiŋuc muwec: “O Wofuŋ, Israere Anutu, sambâŋko me mâreŋko gore sâc Anutu moc mi jujâmbâŋkekac. Goki hâcne kiŋaŋŋicfâcge gore maio maŋ hâcbuc jueŋgopieŋ jaŋe maŋjauŋ fofo sanaŋ ejarehuc jaŋehec ʒâʒâfic emeŋ i mi hetâcneekic.

²⁴Go kiŋaŋŋicge, mamac‐nane Dawidi hâcne, e findaŋdâŋ âzâcnemeŋ irec fârine bâfuameŋ. Go mârâc miczi dâŋ mumeŋ i miŋecgac megezi fârine bâfuakomec.

²⁵O Wofuŋ Israere Anutu, go kiŋaŋŋicge mamac‐nane Dawidi findaŋdâŋ ʒiŋuc âzâcnemeŋ i mutec fârio qazejec: ‘Ŋokâfâcge jaŋe goki nore maio jumeŋ irec sâcko juhuc hata‐jeŋic aimuŋ jaha soŋaŋkehuc nore maio juniŋmuo ine noni mupe go ŋic moc Israere eri ŋeŋeo nore maio ŋeocte mi basacmu.’

²⁶O Israere Anutu, go irec hâcne kiŋaŋŋicge, mamac‐nane Dawidi hâcne dâŋ âzâcnemeŋ i mutec sanaŋkezejec.

²⁷“Jai, Anutu, go mâreŋko sâcne jucmu? Jâmbomac, sambâŋne sambâŋne jaŋe gore sâc mi ehapie go iŋucne sâkozi no fic ʒi bagarepo ira weniŋuc sâcne ŋeŋe juju ecmu?

²⁸O Wofuŋ Anutu‐nane, go kiŋaŋŋicge no miŋecgac gore maio wira wâwâsic ekopac irec hazec râerâ nunumu‐nane manazemec.

²⁹Go fic ʒirec ʒiŋuc mumeŋ: ‘I ʒâŋe‐nanere ŋeŋe hae ezejec’; irec go ŋafe ʒoaŋ sâc fic ʒira ʒâŋe fitec wahazejec â kiŋaŋŋicge no fic ʒira nunumu gie bahape mana‐narezemec.

³⁰Kiŋaŋŋicge no me Israe ŋicfâcge nâŋe fic ʒira wâsicgupene goki faic sambâŋko ŋeŋe haegao juhuc nunumu‐nâŋec manarâ aki anonoc enârezemec.

³¹“Ŋic moczi âgo‐ticnerao bahac ŋemâcne bâfuame âgonezi mumupaŋ dâŋ muocte fânoc hecneme fic ʒira alatagere maŋfuŋko mumupaŋ dâŋ i muocte fisiocmuo

³²ine goki faic sambâŋko juhuc dâŋjekic manarâ kiŋaŋŋic jahecge jahere mumutara gie bahuc ŋic hehesicne eebapa‐ticnere sâcko okacne râcnezemec â bahacmâc juwec e ine tiŋne juju‐ticnere sâcko akickezemec.

³³“Israe ŋicfâcge jaŋe hehesic juhuc bugao bahapie go râsifâc‐jeŋic mana‐jaretec bawahac‐jopapie jaŋe maŋjeŋic bârisiehuc gorao risierâ ʒâŋege mutaniŋkehuc fic ʒira numu hefârec egareniŋmuo

³⁴goki faic sambâŋko juhuc dâŋjeŋic manarâ sâqocne‐jeŋic mutâmire‐jarehuc kâcɋenefâc‐jeŋic mâreŋ jaremeŋ ira mocwâc râec‐jopazemec.

³⁵“Jaŋe hehesic juhuc bugao bahapie goki sambâŋte motâc hetec hoe mi hehe mâc foocmu, eme goki bâtiŋ‐jopakomecte fic ʒira ʒâŋege mutaniŋkehuc sâqocne‐jeŋic beherâ nunumu gie baniŋmuo

³⁶goki faic sambâŋko juhuc dâŋjeŋic manarâ kiŋaŋŋicge no â ŋicfâcge Israe nâŋere sâqocne mutâmirehuc mutec ŋicfâcge mâreŋ‐jeŋic biŋe qajaremeŋ ira hoe hezejec. Go iŋuc ehuc hata biaŋne âte raniŋte qazu‐jareekic hâcne.

³⁷“Eme mâreŋ‐nâŋecko roroc me huc mimicne moc fuaocmu me nânâzi gieo hâmo qanʒaraŋ eocmu me hâpic me qokic guru sâko fisiniŋmu, me râsifâc‐nâŋec jaŋe fisirâ hae‐nâŋec moc somâ baniŋmu me wiac hâhâwicne me hucsâko moc fuaocmu

³⁸me wiac hâhâwicnezi ru sâc buʒâic bâfua‐nâreme ŋic izi me izi me Israe ŋicfâcge sasawa nâŋe numu hefârec egarehuc fic ʒira menâŋec nunumuo sicne‐garenaŋmuo

³⁹goki faic sambâŋko ŋeŋe haegao juhuc aki anonoc enârerâ ru sâc eebapa‐nâŋecte sâcko wiac enârezemec. Goki bucge mâreŋ ŋic sasawa maŋjeŋic hone taraekiczi maŋnâŋec honeekic wâc.

⁴⁰Irec erâ nâŋe kâcɋenefâc‐nâŋec mâreŋ tahac‐jopameŋ ira jufenaŋmu sâc araŋ bagarehuc junʒepeneŋ.

⁴¹“Eme ŋic jaŋe ʒâŋe sâkoge â tâpiri ɋuŋɋasaŋgere biŋe mananiŋmu;

⁴²ehame ŋic furune moc, Israe ŋicfâcge nâŋere guruo mi fuakicnezi mâreŋ ʒorickonec ʒâŋe biŋegere ehuc fisirâ fic ʒira nunumu gie baocmu

⁴³ine goki faic sambâŋko ŋeŋe haegao juhuc dâŋticne manarâ wiac irec me irec numu‐gareme manacnezemec. Go iŋuc etec ŋic gurune gurune mâreŋ sâc juraŋgopieŋ jaŋe ʒâŋe biŋege manarâ Israe ŋicfâcge nâŋe araŋ bagareeŋgopeneŋ irec sâc jaha araŋ bagarehuc ʒiŋuc mananʒepieŋ: Fic bagarepo ʒira ʒâŋe biŋege fokac.

⁴⁴“Eme go ŋicfâcge ira me ira sorec‐nâpotec râsifâc‐nâŋec jopanaŋte ʒikao rahuc hae sâko ʒi bâwosâemeŋ â ʒâŋe biŋege fuaocte fic bagarepo ʒirapec ʒâŋe fihuc gorao nunumu gie banaŋmuo