2Juku jara jahec â moc eha Juda ŋicwofuŋ Josafatazi Israe ŋicwofuŋtao wahawec.
3Eme Israe ŋicwofuŋzi kiŋaŋ qaqafâcne jazarâ muwec, “Ramoti‐Gileade hae i nâŋâcne hae i ŋoŋe manaŋgopieŋ me? Eme nâŋâc Siria ŋicwofuŋte meonec mi roro mâc iŋuc niniŋkerâ junaŋmu me?”
4Iŋuc murâ Josafata ʒiŋuc wiocnewec: “Go Ramoti‐Gileade haeo ʒika qazo mâmâc ranacmu me?” Iŋuc mume Josafatazi Israe ŋicwofuŋ dâŋ ʒiŋuc bâtikiecnewec: “Wiac sasawa fonarekac i gore biŋe jaha; no nahacne mecne, ŋicfâc‐nane mecne â becâsicfâc‐nane mecne nâŋe gore hâcne.”
5Josafatazi iŋuc murâ Israe ŋicwofuŋ ʒiŋuc âzâcnewec: “Qanaŋ Wofuŋtaonec dâŋ manazore mu wioc ezemec.”
6Iŋuc mume Israe ŋicwofuŋ e porofete 400 heririŋ hetumaŋ‐joparâ ʒiŋuc wio‐jarewec: “No Ramoti‐Gileade haeo ʒika qazo rapemu me behepemu?” E iŋuc wiome jaŋe ʒiŋuc âzâcnembiŋ: “Sâcne rac, Wofuŋzi megao râeocmu.”
7Jaŋe iŋuc mupie Josafatazi muwec, “Ʒira Wofuŋte porofete moc juŋgopieŋko jaŋerao wâc mu wioc moc enʒapeŋ me?”
8Iŋuc mume Israe ŋicwofuŋzi Josafata ʒiŋuc âzâcnewec: “Ʒira ŋic moc jukac e Imilare ŋokâ ʒâŋene Mikaja, erao mupene eki sâcne Wofuŋ mu wioc ecneocmu. Erâ ine no ere takicnuekac; e nore findaŋdâŋ biaŋne moc mi muhuc wiac sâqocnere sawa muekac.” Iŋuc mume Josafatazi muwec, “Ŋicwofuŋ go iŋuc mac mi muc.”
9Iŋuc mume Israe ŋicwofuŋ e micne moc hefârerâ ʒiŋuc âzâcnewec: “Go picpac jaha rarâ Imila ŋokâ‐ticne Mikaja jowa warec.”
10Eme Israe ŋicwofuŋ â Juda ŋicwofuŋ Josafata jahe Samaria haere sacmotâcko ŋicwofuŋ ŋaqi‐jekichec eri ŋeŋe‐jekicko ŋehapire porofete jaŋe maŋfuŋ‐jekicko domahuc findaŋdâŋ mumbiŋ.
11Ehame Kenanare ŋokâ Zedekia e jahac aeŋzi ʒuŋe bafârerâ muwec, “Wofuŋ e ʒiŋuc mukac: ‘Wiac ʒiŋucnezi Siria ŋic sâcne hecjopaku hemiziec‐jopaniŋmu.’”
12Eme porofete jaŋe ijaha mufârehuc mumbiŋ, “Ajoc, Ramoti‐Gileade haeo rarâ aŋac ʒeri bâfuac. Wofuŋzi hae i ŋicwofuŋ gore meo râeocmu.”
13Eme kiŋaŋŋic Mikaja jowaocte rawec e ra fisirâ ʒiŋuc âzâcnewec: “Manakic, porofete jaŋere dâŋzi sâc mocjaha efâreme ŋicwofuŋtao biaŋkekac. Irec gore dâŋzi jaŋere dâŋte sâc jaha ehame mutec sâckezejec.”
14Iŋuc mume Mikajazi muwec, “Wofuŋ e jujâmbâŋkekacte dâŋ nazaekac sâc jâmbâŋ mupemu.”
15Iŋuc murâ ŋicwofuŋtao fisime ŋicwofuŋzi ʒiŋuc âzâcnewec: “Mikaja, nâŋe ʒika qanaŋte Ramoti‐Gileade haeo ranaŋmu me behenaŋmu?” Iŋuc mume dâŋ ʒiŋuc bâtikiecnewec: “Go rarâ aŋac ʒeri bâfuac; Wofuŋzi hae i gore meo râeocmu.”
16Iŋuc mume ŋicwofuŋzi âzâcnerâ muwec, “Goki dâŋ burec mi ehuc Wofuŋte ʒâŋeo dâŋ fârinea nazacmurâ dameŋ bocjaha gazaekopac.”
17E iŋuc mume Mikajazi ʒiŋuc muhuc âzâcnewec: “No Israe ŋic honec‐jopape lama soŋaŋ tâmiric iŋucne tikio siaŋ siperec qambiŋ. Iŋuc epie Wofuŋzi kecʒiŋuc muwec: ‘Ŋic ʒi jaŋe bomboŋ tâmiric; irec wamao hae‐jeŋic sâc risienʒepieŋ.’”
18Mikaja e iŋuc mume Israe ŋicwofuŋzi Josafata dâŋ kecʒiŋuc muhuc âzâcnewec: “E nore findaŋdâŋ biaŋne moc mi muhuc wiac sâqocnere sawa muekac i mi gazapac me?”
19Iŋuc mume Mikajazi muwec, “Ʒi ine Wofuŋte dâŋ manac: No Wofuŋ e eri ŋeŋe‐ticnao ŋeme honehape sambâŋko guru dindiŋ jaŋe gâjoŋne ŋifec â ŋifec doma rambiŋ.
20Ehame Wofuŋzi muwec, ‘Mozi Ahaba doc bame rarâ Ramoti‐Gileade haeo ʒikao ferâ hâmoocmu?’ Eme moczi dâŋ moc muwec â moczi moc muwec.
21Ehame mâro moczi fuarâ Wofuŋte maio domahuc muwec, ‘Noni doc bapemu.’
22Iŋuc mume Wofuŋzi wiocnerâ muwec, ‘Wemo wiaczi doc bacmu?’ Mume muwec, ‘No fuarâ porofetefâcne jaŋere micko eeatuc mâro moc epemu.’ Mume Wofuŋzi muwec, ‘Goki hâcne doc batec fârinehec ezejec, irec fuarâ iŋuc ec.’
23Eme irec ʒiŋuc manac: Wofuŋzi porofetefâcge ʒi jaŋere micko eeatuc mâro moc râewec. E gorao wiac repicne fuaocte mupaŋkewec hâcne.”
24Iŋuc mume Kenana ŋokâ‐ticne Zedekiazi Mikajare maŋfuŋko rarâ maucnao qahuc muwec, “Wofuŋte mâro e go dâŋ gazaocte noraonec weniŋuc jaha gorao fâjec?”
25Eme Mikajazi muwec, “Manakic, go soŋkezore ficmaŋ ʒâʒâŋiŋko raʒicmu dameŋ ira ʒâŋe fârigezi honecmu.”
26Iŋuc mume Israe ŋicwofuŋzi muwec, “Ajoc, Mikaja rorâ hae ʒirec mâreŋ soŋaŋ Amoŋ â ŋicwofuŋte ŋokâ Joasi jaherao baraniŋ.
27Ehuc ʒiŋuc munʒepieŋ: ‘Ŋicwofuŋ e kecʒiŋuc mukac: “Ŋic ʒi kâpâcwâru ficko râerâ nânâ afecne mac gumehuc juhapie sahac furu risiezepac.” ’”
28Iŋuc mume Mikajazi muwec, “Go sahac furu risiecmu me mâcne irec dâŋ moc Wofuŋzi nore micko mi râewec.” Iŋuc murâ ʒuhuckerâ muwec, “Ŋic ŋokac sasawa ŋoŋe dâŋ i mananiŋ!”
29Eme Israe ŋicwofuŋ â Juda ŋicwofuŋ Josafata jahe Ramoti‐Gileade haeo rapic.
30Ehuc Israe ŋicwofuŋzi Josafata âzâcnerâ muwec. “No hawari‐nane hetikierâ ʒikao rapemu â goki ine ŋicwofuŋ ŋaqige rojuzemec.” Iŋuc murâ Israe ŋicwofuŋ e hawari‐ticne hetikiewec. Eme ʒikao rambiŋ.
31Eme Siria ŋicwofuŋ e keretacfâc‐ticne jaŋere micne 32 jaŋe ʒiŋuc jazawec: “Ŋoŋe ŋic fekicne wahakicne mi jopahuc Israe ŋicwofuŋ e sawa qanʒepieŋ.”
32Eme keretacte micne jaŋe Josafata honerâ mumbiŋ, “E hâcne Israe ŋicwofuŋ.” Iŋuc murâ risierâ e qazo ehapie Josafatazi owackewec.
33Owackeme keretacte micne jaŋe e Israe ŋicwofuŋ mâcne, i hone tararâ râpeckerâ rambiŋ.
34Ehame ŋic moczi tepe‐ticne âpârehuc kosa qâtâcnekopac muhuc Israe ŋicwofuŋ e becsahac â amecfoŋ ʒuʒuhuc‐jekicko muruwec. Murume keretac guriŋ bapa‐ticne âzâcnerâ muwec, “Ajoc, keretac bâtikierâ ʒikaonec bacnu rac, no biac ʒâpâ murucnuŋgopieŋ hâcne.”
35Eme ʒoaŋ ira ʒikazi boc ɋârâŋkewec â ŋicwofuŋ e ine keretac‐ticnao dopeckehapie Siria ŋic honec‐jopahuc ŋeku ŋafeme hâmowec. Ehame murumbiŋ irec soczi keretac rurumaŋko waha rahuc fowec.
36Ehame ʒoaŋ ŋetarazo eme momori jaŋerao wiwira moc ʒiŋuc fuawec: “Ajoc, ŋic sasawa hae mâreŋ‐ŋeŋic sâc rafâreniŋ!”
37Eme ŋicwofuŋ e hâmome Samaria haeo bafisirâ duckembiŋ.
38Ehuc keretac i Samaria haeo opâ ʒâkâŋ fowec ira ʒurepie qâto jaŋe socticne apurumbiŋ. Ehame wâc sasec ŋokac jaŋe ijaha ruambiŋ. Wiac i Wofuŋzi dâŋ muwec irec sâcko fuawec.
39Eme Ahabazi wiac sasawa ebac ewec â fic erinehec bawec, erâ hae sasawa barawec irec binaŋ i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.
40Eme Ahaba e apa ŋosafâcne jaŋerao ʒuhuckehuc hâmome ŋokâ‐ticne Ahaʒiazi tucticne qarâ ŋicwofuŋ juwec.
41Ahaba e Israe ŋicwofuŋ jume jara jahec â jahec eha Asare ŋokâ Josafatazi fuŋkerâ Juda ŋicwofuŋ ewec.
42Josafata e jara‐ticne 35 bazurâ ŋicwofuŋ gie fuŋkewec, erâ Jerusalem haeo bahuc juhame jara 25 tarawec. E neŋgoc‐ticne i Silehire otâ, ʒâŋene Aʒuba.
43Josafata e mamac‐ticne Asa ere kike hata bâjâpewec. Ehuc moc mi qâsoriehuc Wofuŋte ʒâŋe faio wiac sasawa eme sâcke‐fârewec. Erâ ine furu mâreŋ i mi bârârie‐fârekicnere ŋic ŋokac jaŋe furu mâreŋko taha bâzi â hosâc âsu i rikehuc jumbiŋ jaha.
44Josafata e Israe ŋicwofuŋhec wama qaqac epic wâc.
45Josafatazi wiac sasawa ebac ewec â tâpiri‐ticnere fuŋne jowatuwec â ʒika qawec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne.
46Mamac‐ticnere dameŋko boe sau ŋic ʒanʒaŋne jumbiŋ i jaŋe eki hâcne mâreŋ irecnec jâpec‐jopawec.
47Edom mâreŋko ŋicwofuŋ moc mi juwec, ŋicwofuŋ mefâro‐ticnezi sawa juwec.
48Eme Josafata e Tarasisi haeonec woke jaŋe Ofiri haeo rarâ gol roniŋte sorec‐jopawec. Erâ ine woke jaŋe Ezioŋ‐Gebe haeo qanʒaŋne‐fârembiŋte mi rambiŋ.
49Eme Ahaba ŋokâ‐ticne Ahaʒiazi Josafata kecʒiŋuc muhuc âzâcnewec: “Nore kiŋaŋ qaqafâc jaŋe sifu gore kiŋaŋ qaqafâc jaŋehec wokeo ranʒepieŋ.” Iŋuc muhuc âzâcneme Josafata e dâŋ i manarâ mi afeckewec.
50Juku Josafata e apa ŋosafâcne jaŋerao ʒuhuckehuc hâmome jaŋe fombiŋkoa apa‐ticne Dawidire hae qizecko duckembiŋ. Ehame ŋokâ‐ticne Joramzi tucticne qarâ ŋicwofuŋ juwec.
51Josafata Juda ŋicwofuŋ jume jara 17 eha Ahaba ŋokâ‐ticne Ahaʒiazi fuŋkerâ ŋicwofuŋ ehuc Samaria haeo juwec. Ehuc jara jajahec Israe ŋic jaŋere ŋicwofuŋ juwec.
52E neŋgoc mamac jahec‐ticne jahere kike hata bâjâpehuc Wofuŋte ʒâŋe faio wiac mamakâcne ewec. Ehuc Nebate ŋokâ‐ticne Jeroboamzi Israe ŋic ejareme hehesic bâfuambiŋ, hehesic i wâc bâjâpewec.
53Erâ Baali nemu kiŋaŋ qacnehuc dapecnewec. Ehuc mamac‐ticnezi hata sasawa âtewec i bâjâpe‐fârehuc Israere Wofuŋ Anutu kimbeŋ bâfuacnewec.
Ŋicwofuŋ I 22
Ŋicwofuŋ I 22:2-53