Än Salomon Fos 27:2-17

²A öch eman epwe mwareituk, ika eman chon ekis, nge sap püsin en.

³Eföü fau a chou, pwal pi, nge ach osukosuk ren eman chon tiparoch a chou seni ekewe ruu mettoch.

⁴Song a fokun ngau, nge lingeringer a usun chök eu noter. Nge lolowo a fokun afeiengau seniir.

⁵A mürina om kopwe apwüngü eman le pwäpwäla lap seni om kopwe tongei eman, nge kosap pwäri ngeni.

⁶Atongeom a ekieki om feiöch, inamwo are a akinasok. Nge än chon oputom mitiruk esap let.

⁷Eman mi fokun möt a oput chönün chunen, nge mongö mi kipwin a annö me ren eman mi echik.

⁸Eman aramas mi towu seni lenian a usun eman machang mi sü seni fasan.

⁹Noppuk me löpokus ra apwapwai leluken aramas, nge osukosuk a atai kinamwen aramas.

¹⁰Kosap likitala chiechiom me chiechien semelapom, nge kosap feila lon imwen pwiüm lon ränin om feiengau. Eman chon arum mi kan ngonuk a tongeni alisuk, lap seni eman pwiüm mi toau senuk.

¹¹Nei, kopwe tipachem o apwapwai lelukei, pwe üpwe tongeni pälüeni ätewe mi aitengauaei.

¹²Eman aramas mi mirit a küna ewe feiengau mi feito o opola, nge ekewe chon wewemang ra chök feilong lon o feiengau.

¹³Kopwe angei üfen ätewe mi pwon pwe epwe mönätiu än eman wasöla liwinimang o amwöchü pwe asisilen an pwon ngeni eman chon ekis.

¹⁴Eman mi älälei chon arun fän leüömong pwe epwe feiöch lupwen an pwätä lesosorusich a usun chök pwe a otteki.

¹⁵Eman fefin mi lalapat a usun chök chiin üt mi püng fochofoch lupwen fansoun räningau.

¹⁶Om kopwe aükätiu än neminewe lal a usun chök om kopwe aükätiu asepwäl, ika om kopwe kumwuchuw noppuk lon poum.

¹⁷Mächä a akeni mächä, iei usun eman aramas a tongeni aöchüela pwal eman.