Än Salomon Fos 24:3-26

³Eu imw a kaütä ren tipachem o nükünük ren mirit,

⁴nge ia a wor silelap ie, ekewe rumwen lon ra ur ren sokopaten pisek mi aüchea me mürina.

⁵Eman aramas mi tipachem a wor an manaman, nge eman aramas mi silelap a fokun wor an pöchökül.

⁶Kopwe akomwen föri om akot me mwen om kopwe feila ngeni maun, nge ia a wor chomong chon öüröür ie, a wor win.

⁷Kapasen tipachem ra kon tekia ngeni eman chon tiparoch, esap wor och mine a tongeni apasa lon mwichen pwüngüpwüng.

⁸Eman mi ekiekietä mine a ngau epwe iteni chon afisätä rawangau.

⁹Mine eman chon tiparoch a ekiekietä iei tipis, nge aramas ra oput eman mi turunufasei chon arun.

¹⁰Are ka apilükingau lon fansoun riaföü, om pöchökül a kisikis.

¹¹Kopwe amanaua chokewe ra nukunuk ngeni mäla. Kopwe amwöchü chokewe mi äpäp ngeni ar repwe ninnila.

¹²Are ka apasa pwe kosap silei usun ei lapalap, ifa usun, ewe mi atittina leluken aramas esap küna? Ifa usun, ewe mi mamasok esap silei? I epwe liwini ngeni eman me eman aramas ükükün liwinin an föför.

¹³Nei, kopwe ün chönün chunen, pun a annö. Nge usun supun ewe fasen chunen a arar ngonuk,

¹⁴iei usun kopwe silei pwe tipachem epwe mürina ngonuk. Are ka küna tipachem, epwe wor om apilüköch ngeni ewe fansoun mwom, nge kosap lichipüng lon om apilükülüköch.

¹⁵Kosap operi imwen ewe chon pwüng usun eman aramasangau, kosap pwal tolong lon o angei pisekin fän pöchökül.

¹⁶Pun inamwo ika eman chon pwüng a turula fän fisu, a chök pwätäsefäl. Nge feiengau epwe tori ekewe aramasangau.

¹⁷Kosap meseik ren chon oputom, lupwen a tolong lon feiengau, kosap pwal pwapwa, lupwen a chepetek.

¹⁸Pun ewe Samol mi Lapalap epwe küna o oput ei lapalap, epwe pwal asepa an song seni ätewe.

¹⁹Kosap öürek pokiten ekewe chon föföringau, kosap pwal lolowo ngeni ekewe aramasangau.

²⁰Pun ekewe chon föföringau esap wor ar apilüköch ngeni ewe fansoun mwer, nge manauen ekewe aramasangau epwe müchüla.

²¹Nei kopwe niuokusiti ewe Samol mi Lapalap o asamolu ewe king, nge kosap chiechi ngeni chokewe mi ü ngeniir.

²²Pun feiengau epwe müttir toriir. Nge iö a tongeni silei ewe mäfeiengau epwe feito seni Kot me ewe king?

²³Ikkei pwal ekoch mwiitun seni ekewe mi tipachem: A ngau ngeni eman soukapwüng an epwe lifilifil aramas lon kapwüng.

²⁴Are a apasa ngeni ewe chon tipis pwe esap wor an tipis, ekewe aramas meinisin repwe otteki o oputa.

²⁵Nge ekewe soukapwüng mi apwüngü ekewe chon tipis repwe fefeitä o iteüöch.

²⁶Eman mi pälüeni chienan fän wenechar, iei asisilen ar pwipwiöchfengen fän let.