Än Salomon Fos 23:6-17

⁶Kosap mongö enen eman aramas mi kichingau. Kosap mochenia ngeni anan mongö mi fokun annö.

⁷Pun i ewe sokun aramas mi chök ekieki usun liwin. A ürenuk, “Kopwe chök mongö o ün,” nge lon lelukan esap wenechar ngonuk.

⁸Kopwe musäsini ewe mongö ka fen eni, nge om kewe kapasen kilisou repwe lomotongau.

⁹Kosap fos ngeni eman chon tiparoch, pun esap aücheani om kewe kapasen tipachem.

¹⁰Kosap amwökütü ekewe kiä minen lomlom ika tolong lon fanüen ekewe mi mäsen.

¹¹Pun ewe Samol mi Lapalap ar chon alisi mi pöchökül epwe peniir o ü ngonuk.

¹²Kopwe suki lelukom ngeni ekewe kapasen öüröür o aü selingom ngeni ekewe kapasen silelap.

¹³Kosap tipemwaramwar le apwüngü noum. Are ka wichi ngeni efoch wok, esap mäla.

¹⁴Are ka wichi ngeni efoch wok, ka tongeni amanaua manauan seni mäla.

¹⁵Nei, are kopwe mirit, üpwe fokun pwapwa.

¹⁶Lelukei epwe mwänek, are ka apasa kapas mi pwüng.

¹⁷Kosap lolowoiti ekewe chon tipis, nge kopwe chök achocho lon om niuokusiti ewe Samol mi Lapalap fansoun meinisin.