Än Salomon Fos 22:10-20

¹⁰Kopwe asüela eman chon turunufas, mürin esap chüen fis fitikoko, anini me kapasingau.

¹¹Eman mi eäni eu leluk mi limöch o eäni kapas pwetete, ewe king epwe chiechi ngeni.

¹²Ewe Samol mi Lapalap a tümwünü chon silelap, nge a atai än chon chofana kapas.

¹³Ewe chon chipwang a apasa, “A wor eman laion lükün imwei, a tongeni fis pwe üpwe mäla won ewe al.”

¹⁴Än eman fin lisowu kapas ra usun chök eu pwang mi alolol, ätewe ewe Samol mi Lapalap a song ngeni epwe turulong lon.

¹⁵Semirit ra chök föri föförün chon tiparoch, nge lupwen ra angei wichiwich, repwe kaiö mine a öch.

¹⁶Eman mi ariaföüü ekewe chon wöüngau pwe epwe awatteloi wöün ika fangala lifang ngeni ekewe chon pisekisek, epwe chök wöüngauala.

¹⁷Kopwe aü selingom o rongorong, pun üpwe aiti ngonuk än ekewe chon tipachem kapas. Kopwe kaiö ngeni ar kewe kapasen kait.

¹⁸Pun kopwe pwapwa ren om kopwe amwöchüür lon lelukom o molotä ngeni om kopwe apaserewu.

¹⁹Üa mochen pwe kopwe anomu om apilükülük won ewe Samol mi Lapalap, iei mine üa asile ngonuk ekei kapas ikenai.

²⁰Üa maketiu fän itom ilik mwiitun mi masou ren kapasen öüröür me silelap.