Än Salomon Fos 17:8-22

⁸Ekoch aramas ra ekieki pwe ar lifangen amichimich a usun chök roong, ra lükü pwe epwe alisiir lon mettoch meinisin.

⁹Eman mi mochen pwe aramas repwe tongei epwe amusala ar tipis ngeni, nge eman mi achemasefäli tipisin eman a tongeni ataela chiechifengen.

¹⁰Eu kapasen apwüng ngeni eman mi mirit a watte eselipäan, lap seni eselipäen ipükü wichiwich ngeni eman mi tiparoch.

¹¹Eman aramas mi ngau a chök mochen ükü ngeni aramas, iei mine eman chon künö mi uwei kapasen afeiengau a tiitiila ren.

¹²A mürina ach sipwe churi eman liefefinin pear aramas ra angei seni apanan, lap seni ach churi eman chon tiparoch lon an umwes.

¹³Are eman aramas a liwini ingau fän iten föför mürina, feiengau esap sü seni imwan.

¹⁴Ach popuetä eu anini a usun chök ach pwangeni eu epetin koluk, iei mine kopwe ükütiu mwen ewe anini epwe lapala.

¹⁵Ewe Samol mi Lapalap a oput ätewe mi aitöchü ekewe aramasangau me ätewe mi atipisi ekewe chon pwüng.

¹⁶Met lomoten an epwe wor moni lepöün eman chon tiparoch? Ifa usun epwe tongeni möni tipachem, nge esap wor an mirit?

¹⁷Eman chiechiach a tongeekich fansoun meinisin, nge pwiich a nom rech pwe epwe alisikich lon fansoun riaföü.

¹⁸Eman aramas esap mirit a pwon pwe epwe mönätiu än chon arun liwinimang o ngeni asisilen an pwon.

¹⁹Eman mi efich anini a pwal efich tipis, nge eman mi eäni kapas tunosikesik a kütta feiengau.

²⁰Eman aramas mi rikirik lelukan esap fefeitä, nge eman mi eäni kapas atuputup epwe tolong lon osukosuk.

²¹Eman nau mi tiparoch a aworato lolilen ngeni saman, nge semen eman mi umwes esap pwapwa.

²²Eman mi pwapwa lon lelukan iei eu säfei mi mürina, nge eu leluk mi lolilen a asemweni eman.