Än Salomon Fos 14:18-34

¹⁸Ekewe chon wewemang repwe angei mine a fich ngeniir lon ar tiparoch, nge ekewe mi mirit repwe angei silelap pwe liwiniir.

¹⁹Ekewe chon föföringau ra wisen rotiu me fän mesen ekewe aramasöch, nge ekewe aramasangau ra wisen rotiu me ünükün asamalapen imwen ekewe chon pwüng.

²⁰Eman chon wöüngau a koput me ren aramas, pwal mwo nge ren chon arun, nge eman chon wöümong a wor chomong chiechian.

²¹Eman mi oput chon arun a tipis, nge eman mi kirikriöch ngeni ekewe chon wöüngau epwe feiöch.

²²Chokewe mi ekiekietä mine a ngau repwe tokola. Nge chokewe mi ekiekietä mine a mürina repwe angei ümöümöch me allükülük.

²³Eman mi weires le angang epwe angei winnan, nge eman mi kapas chök epwe tolong lon osupwang.

²⁴Än ekewe chon tipachem pisekisek iei ar lingöch, nge än ekewe chon tiparoch wewemang iei ar umwes.

²⁵Eman chon pwärätä mine a let a amanaua aramas, nge eman mi eäni kapas chofana eman chon afangamä aramas.

²⁶Än eman aramas meniniti ewe Samol mi Lapalap a atoto an apilükülüköch me nonomöchün me chon an famili.

²⁷Än eman aramas meniniti ewe Samol mi Lapalap iei eu puächen manau, pwe esap tolong lon ewe feiengauen mäla.

²⁸Eman king a iteüöch ren chomongun nöün aramas, nge eman samol esap wor nöün aramas esap wor manan.

²⁹Eman mi mang ngeni song a watte an weweöch, nge eman mi müttir ngeni song a pwärätä watten an tiparoch.

³⁰Eu letip mi kinamwe a awora pöchökülen inis, nge lolowo a usun chök kanser lon chü.

³¹Eman mi ariaföüü ekewe chon wöüngau a esita ewe Chon Föriir, nge ätewe mi kirikiröch ngeni ekewe chon mwelele a asamolu Kot.

³²Ekewe aramasangau ra feiengau ren püsin ar föför mi ngau, nge ekewe chon pwüng a wor ar lenien op lupwen ar mäla.

³³Tipachem a nonom lon letipen ekewe aramas mi wewekai, nge esap tongeni nom lon letipen ekewe chon tiparoch.

³⁴Pwüng a afefeitäi eu mwü, nge tipis a afefeitiua o aitengaua.