Zone 13:1-17

¹Koasa rane sipu lopu ele kamo sa Inevaṉa Pasova, si ele gilania tu Zisu sapu ele kamo sa totoso pude luaria Sa sa kasia popoa hie, meke pule la koasa Tamana. Doduru totoso si tataru ni Sa sari Nana tie koasa kasia popoa, meke lopu kokoi mo pa minate sa Nana tataru koa rini.

²Pa korapana sa hinenahena veluvelu te Zisu koari Nana disaepeli, si ele vekoa tu Setani sa binalabala pa bulona e Ziudasi Isikarioti, sa tuna e Saimone Isikarioti, pude qora ia gana se Zisu, gua.

³Ba ele gilania tu Zisu, sapu ele ponia sa Tamana pa limana sari doduru ṉiniraṉira; meke ele gilania tugo Zisu sapu maena koe Tamasa si Asa, meke kote pule la koe Tamasa.

⁴Ke gasa turu si Asa, meke va gore vekoa Sa sa Nana poko hake ulue, meke dokoho nia Sa si keke taoro pupuhana.

⁵Meke voi nia kolo Sa si keke besini, meke podalae ṉuzapi Sa nenedi sari na disaepeli, meke puha va popa ni Sa koasa taoro, sapu dokoho nia Sa.

⁶Sipu kamoa Sa se Saimone Pita, si zama se Pita, “Baṉara, kote ṉuzapi mo Goi sari na nenequ?” gua si asa.

⁷Meke olaṉa la ia Zisu si asa, “Lopu gilania goi kamahire, gua sapu korapa tavetia Rau, ba pana hola sari na tiṉitoṉa hire si kote gilania goi,” gua se Zisu.

⁸Meke zama se Pita, “Lokari! Lopu kaqu ṉuzapi Goi sari nenequ!” Meke olaṉa se Zisu, “Be lopu ṉuzapi Rau sari nenemu, si lopu kaqu na Qua disaepeli si goi,” gua si Asa.

⁹Meke olaṉa pule la se Saimone Pita, “Baṉara, pude gua si lopu sari nenequ mo, ba sari limaqu, na batuqu tugo!” gua si asa.

¹⁰Meke zama la se Zisu, “Asa sapu ele huvena, si ele via mo, meke lopu kaqu huve pule, ba sari na nenena si pada ta ṉuzapa. Gamu si ele via, ba keke mo koa gamu si lopu via.”

¹¹Ele gilania tu Zisu si asa pu kote qorana, gua asa ke zama guahe si Asa, “Keke mo koa gamu si lopu via,” gua.

¹²Meke sipu beto ṉuzapi Zisu sari na nenedi, si va sage pulea Sa sa Nana poko hake ulue, meke la habotu pule Nana pa tevolo si Asa. Meke nanasi Sa si arini, “Vegua, gilania tugo gamu sapu gua tiqe tavetia Rau koa gamu?” gua si Asa.

¹³“Poza Nau Titisa na Baṉara gamu, meke hinokara mia tugo, sina gua tugo asa si Rau.

¹⁴Ego, be Arau, sa mia Baṉara meke sa mia Titisa si ele ṉuzapi sari nenemia, si ego, gamu ba mi tavete kekeṉoṉo gua tugo asa pa varikorapa mia.

¹⁵Ele va dogoroni gamu Rau sa Qua vina titila, gua asa ke mi tavete lulia sapu gua taveteni gamu Rau.

¹⁶Maqu tozi va hinokarani gamu: loke nabulu si ululu hola nia sa nana palabatu, meke loke tie ta garununa si ululu hola nia si asa pu garununa sa.

¹⁷Ego, kamahire si ele gilania gamu sa hinokara hie, ke kaqu ta manae si gamu, be tavetia gamu sapu gua asa!