SAN JUAN 13:1-17

¹Mach to c'ot q'uin ch'uje ta paxcu', aj Jesús yuwi chich cache' ac'oti q'uin pasic une pancab, bixic ca'an u Pap; u yajna'ti ni tubajobba ni ya'anob pancabba, y mäx u yajna'tan ixta tu xupiba q'uin.

²Jinq'uin ya'anob tä c'uxnan, ni diabloba san chich u yäc'bi u c'ajalin aj Judas u yajlo' aj Simón Iscariote tuba u yäq'ue' tä c'äbä aj Jesús.

³Aj Jesús yuwi cache' u Pap u yäc'bi upete tu c'äb y yuwi täcä cache' une pasi ca'an Dios, y ya' chich u sujtä ca'an Dios.

⁴Ch'oyi bajca an tä c'uxnan, u pochi u buc, u ch'i ump'e noc' u cächi tu näc'.

⁵De ya'i u yäq'ui ja' tama ump'e c'ämbita, u täq'ui u pocben yoc u yajcänt'anob u sucbenob t'oc ni noc' ya' cächä tu näc'ba.

⁶C'oti bajca an aj Simón Pedro. Aj Simón Pedro u yälben ca'da: ―Cajnoja, ¿ane quira a pocbenon coc?

⁷Aj Jesús u yälbi: ―Jini cä chen no'onba, mach a wi une bada. Ji'pat to a xe a wina'tan.

⁸Aj Pedro u yälbi: ―No'on mach bay uxet a pocbenon coc. Aj Jesús u p'ali: ―Si mach a wäcta cä pocbenet a woc, mach anet t'oc no'on.

⁹Aj Simón Pedro u yälbi: ―Cajnoja, mach seq'uen coc, cä c'äb y cä pam täcä co a pocbenon.

¹⁰Aj Jesús u yälbi: ―Machca múqui, mach ni' c'änä muquic, sec' u poque' yoc, poco an entero untu. Anelaba poco anetla, pero mach apetela.

¹¹Uc'a une yuwi caxcone u xe u yäq'ue' tä c'äbä. Jin uc'a u yäli: “Mach poco anetla apetela”.

¹²Cuanta u pocbijob yoc, u xoji u buc, chunwäni tä cha'num tä mesa, u yälbijob: ―¿A wila cua' acä cherbetla?

¹³Anela a wälbenonla cache' Maestrojon y Ajnojalon. Utz chich cua' a wäle'la, uc'a jinon chich.

¹⁴Si no'on a Maestrojon y a Wajnojalon acä pocbet a wocla, che' chich c'änä a chenla täcä, a maläc poque' a wocla.

¹⁵Jin uc'a cä ye'betla ca' jini, uc'a ca' chich acä cherbetla, che' chich a chenla täcä.

¹⁶Totojtoj cälbenetla, ajpatan mach jin más ajnoja que u yum; ajtäsquinte mach jin más ajnoja que machca u täsqui.

¹⁷Ya'an ch'a'aljin ta'ala si a wila jinda y si a chenla.