Yohanes 13:1-17

¹Fosi a Paskafesa doro, Yesus ben sabi tak' a ten doro fu A libi grontapu go na En P'pa. Èn A lobi den sma fu En di A ben lobi na grontapu, te na a kba.

²A pisten di Yesus nanga den man fu En ben e nyan, dan didibri ben gi Yudas, a manpikin fu Simon Iskariot, a prakseri kba fu a seri En.

³Yesus ben sabi tak' a P'pa ben poti ala sani na ini En anu. A ben sabi tak' A ben kmopo fu Gado èn tak' A bo drai go baka na En.

⁴Dat' meki A opo, A puru En tap'sei krosi, dan A tai wan duku lontu En bere.

⁵Baka dati A kanti watra na ini wan beki, dan A bigin wasi den futu fu den man fu En. Dan A drei den nanga a duku san ben tai lontu En bere.

⁶Di a doro na Simon Petrus, a disi taigi En taki: “Masra, na wasi Yu wani wasi mi futu?”

⁷Yesus piki en taki: “Yu no man ferstan san Mi e du now, ma wan dei yu o sabi.”

⁸Dan Petrus taki: “Masra, solanga mi e libi, Yu no sa wasi mi futu!” Ma Yesus piki en taki: “Efu Mi no wasi yu futu, yu no man de wan sma fu Mi.”

⁹Ne Simon Petrus piki En taki: “Masra, dan Yu no mus wasi mi futu wawan, ma mi anu nanga mi ede tu.”

¹⁰Yesus taigi en taki: “A sma di wasi en skin, krin kba. A abi fu wasi en futu nomo. Un krin, ma a no un alamala.”

¹¹Yesus taki so bika A ben sabi kba suma bo seri En. Dat' meki A taigi den taki den alamala no krin.

¹²Di A kba wasi den futu, A weri En tap'sei krosi, dan A go sidon na En presi baka. Dan A taigi den taki: “Un ferstan san Mi du gi unu?

¹³Unu e kari Mi Meister nanga Masra, èn un abi leti, bika na dati Mi de tu.

¹⁴Efu Mi leki un Masra nanga un Meister, wasi un futu, dan un mus wasi makandra futu tu.

¹⁵Bika Mi gi un wan eksempre, fu un kan du leki fa Mi ben du gi unu.

¹⁶Fu tru Mi e taigi un taki: Wan knekti no hei moro en masra, èn wan boskopuman no hei moro a wan di seni en.

¹⁷Now di un sabi den sani disi, Gado sa blesi unu efu un du den.