Zinama Tumatumae 6:7-21

⁷Loke dia koimata, loke tie tuturaṉa babe na palabatu,

⁸ba hata varigara ginani si arini totoso maṉini sa popoa, meke qireqire nia arini sa totoso ibu.

⁹Agoi na tie hakohako, vea seunae gua si kote puta goi? Totoso sa si kote tekulu goi?

¹⁰Na puta hite, opo hite mata, polo hitei sari lima pude magogoso,

¹¹gua hoi si raza mo sa hinabahuala, guana tie hikohikona, minalaṉa si rapata guana keke kana.

¹²Keke tie loke laena meke na tie kaleana si ene vilorae lamae meke zama hoboro nia ṉuzuna,

¹³meke putaputa kale mata pude turaṉa va sea igo, zozoti nene na sipusipu lamae,

¹⁴pa dia binalabala si pude taveti kaiqa ginugua sinekesekei gua, doduru totoso si na tinasuna mo si hiva evaṉi rini.

¹⁵Gua asa ke kote hinoqa kamoi na kinolura si arini; hodahodaki si raza mo sa tinahuara sapu loke hinarupu koa ia.

¹⁶Koa dia si ka onomo ginugua sapu kana hola i e Zihova, ka zuapa tiṉitoṉa sapu lopu qetu sisigiti ni Sa:

¹⁷sa dinoṉo vahesi pule, na mea sapu kokoha, na lima sapu va mate tie loke nana sinea,

¹⁸na bulo sapu hatahata ginugua kaleadi, sa nene sapu tuturei haqala la pa kinaleana,

¹⁹sa tie va sosode sapu kokohana, meke sa tie sapu sovutu tinasuna koari tasina.

²⁰Tuqu, mu kopu ni gua sapu tozi nigo sa tamamu, lopu kilui sari vina tumatumae tanisa tinamu.

²¹Pusi ni ninae rane pa bulomu; mamu pakui pa ruamu.