Zinama Tumatumae 28:12-28

¹²Totoso bokaboka sa tie toṉoto si qetuqetu sari na tie; ba totoso vagi ṉiniraṉira sari na tie kaleadi, si la tome sari tie.

¹³Asa pu tomei sari nana sinea si lopu koa va leana, ba asa pu helahelae ni meke veko pani si ta taleosae koe Tamasa.

¹⁴Mani tamanae sa tie pu pamaṉa nia doduru totoso se Zihova, ba asa pu korona pa bulona si kamo la pa tinasuna.

¹⁵Guana laione kurumuna babe na totorona sa bea sa tie kaleana pu baṉara ni sari tie si ṉoṉovala.

¹⁶Na baṉara sapu ṉoṉovala si loke nana ginilagilana, ba asa pu kilui sari tinago hinikodi si kote toa va seunae.

¹⁷Asa pu va mate tie si ta sigiti nia sa sinea pa nana binalabala meke kote koa gua lamo asa osolae mate; mani loke tie la toka nia.

¹⁸Asa pu ene pa tinoṉoto si kote ta kopue, ba asa pu lopu leana sa nana hahanana si kote lopu sana hoqa.

¹⁹Asa pu tavetavete nia sa nana pepeso si kote soku gana ginani, ba asa pu koa va gulegulea si kote kamo habahuala.

²⁰Sa tie raṉeraṉena si kote soku nia minana, ba asa pu hiva tuturei tagotago si kote kamoa tinasuna.

²¹Pude va kalekale pa totoso varipitui si lopu leana, ba pa vasi bereti mo si boka tavete va sea sa tie.

²²Sa tie puhi si bebeno hiva tagotago ba paere koasa sapu aqa nia na hinabahuala si asa.

²³Asa pu gegesia sa tie si pa vina betona ta qetue hola, hola nia sapu asa pu zama va lomolomoso.

²⁴Asa pu hiko koasa tamana babe tinana meke zama, “Loketoṉa si tavete va sea ia rau” si na baere tanisa pu va huhuara.

²⁵Sa tie puhina si va gevugevuru vinari zamai, ba asa pu raṉea se Zihova si kote koa valeana.

²⁶Asa pu raṉe pule nia si na tie pekipeki, ba asa pu ene pa ginilagilana si lopu kote kamoa tinasuna.

²⁷Asa pu vari poni la koari na malaṉa si lopu kote qaga nia keketoṉa, ba asa pu korona liṉana la i si arini si kote ta levei.

²⁸Totoso vagi ṉiniraṉira sa tie kaleana, si la tome sari tie; ba totoso mate sari tie kaleadi si bokaboka pule sari tie toṉoto.