Zinama Tumatumae 27:10-19

¹⁰Mu lopu luara pania sa mua baere meke sa baere tanisa tamamu, meke lopu la pa vetu tanisa tasimu pana raza igo tinasuna, sa turaṉamu pa kalimu si leana hola nia sa tasimu pa seu.

¹¹Tuqu, mu gilae, mamu va qetua sa buloqu; pude qu olaṉi sarini pu zama va gore au.

¹²Sa tie balabala valeana si dogoria sa tinasuna meke tome; ba sa tie pupuhu si totoro la meke ta raza nia sa.

¹³Vagia sa poko tanisa tie pu va egoa pude lipua sa gale tanisa votiki tie; tuqe vekoa osolae lipua sa sa gale tanisa tie karovona.

¹⁴Be pana munumunu hokara si mana nia sa tie si keke turaṉana, meke velavela nia sa, si kote ta avoso guana lineveleve mo.

¹⁵Na barikaleqe nominomi si guana honihoni pa vetu totoso rukuruku.

¹⁶Sa vina nosona si guana vina nosona sa givusu, babe guana taṉini vagi oela pa lima.

¹⁷Gua sapu sa aeana va ṉarua sa aeana, sa tie va tumatumae ia sa si keke tie pule.

¹⁸Asa pu kopu nia sa huda piqi si kote hena ia tugo sa vuana, meke sa nabulu pu kopu nia sa nana palabatu si kaqu tava lavata.

¹⁹Gua sapu dogoria goi sa isumatamu pa kolo, sa bulona sa tie si ta dogoro koasa tie.