Zinama Tumatumae 14:19-35

¹⁹Sari tie kaleadi si hoke todoṉo ni sari tie leadi, meke sari tie koluradi si tepatepa tinokae koari tie toṉoto.

²⁰Sari tie malaṉa si ta hakohakoe tugo koari turaṉadia, ba sari tie tagotago si soku sari na dia baere.

²¹Asa pu hakohako nia sa turaṉana si sea, ba tamanae si asa pu tataru ni saripu loke gedi.

²²Sarini pu kuhana ni si kaiqa hiniva kaleadi si hoke muliuṉu taloa tugo, ba arini pu balabala pude tavete va leana si kote vagia sa tataru nabuna meke sa sinoto va nabu koe Tamasa.

²³Doduru tinavete mamatadi si koai na lineana, ba sa zama palae si na minalaṉa kamoa.

²⁴Sari na tinagotago tadi na tie gilaedi si na dia toropae baṉara, ba sa dinuviduvili si na pakupaku tadi tie pekipeki.

²⁵Na tie va sosode hinokara si harupu tie, ba sa tie va sosode kokoha si sekesekei.

²⁶Asa pu pamaṉa nia se Zihova, si ta kopue koa Sa, meke sari nana koburu kote boka la tome vasina.

²⁷Na pinamaṉana e Zihova si na bukaha tanisa tinoa, va kekere taloa ia sa tie koasa sipata tanisa minate.

²⁸Na butubutu nomana si na ṉiniraṉira tanisa baṉara, ba pana loketoṉa tie si loke laena mo sa koburu tavia.

²⁹Sa tie sapu lopu bugoro si tagoa sa ginilagilana, ba asa pu bubugoro haru si va vura ia sa nana pinekipeki.

³⁰Na bulo sapu koa bule si ponia tinoa sa tini, ba sa kinonokono si va popozu susuri.

³¹Asa pu ṉoṉovali saripu malaṉa si va sisire nia sa sa Tamasa pu tavetedi, ba asa pu tataru nia sa tie loke gana si pamaṉa nia sa Tamasa.

³²Totoso kamo sa tinasuna si hoqa gore sari tie kaleadi, ba totoso kamo sa minate si ta rupaha dia sari tie toṉoto.

³³Na ginilagilana lohina si koa pa bulona sa tie gilaena, meke koari pu pekipeki ba vata gilana pule nia si asa.

³⁴Na tinoṉoto si ovulia sa butubutu, ba na sinea si variva kurekure koari na tie.

³⁵Na baṉara si qetu nia sa nabulu gilaena, ba sa nabulu variva kurekurena si ta ṉaziri nia sa.