Zatù 1:4-14

⁴Hein nenurung is tribu ni Juda, ne impezaag kandan te Nengazen is menge Canaanhen wey Pirisihanen. 10,000 he etew is nepatey zan diyà te Bezek. Hien mibpekidtebek dan diyà te Bezek, neingkuwintru zan si Adoni Bezek he hadì dutun he inged.

⁶Mibpelaǥuy si Adoni Bezek, piru midal-as sikandin te menge Israilihanen ne nezekepan dan sikandin, ne midtamped dan is menge tindezekelà te menge velad din wey menge paa zin.

⁷Migkaǥi si Adoni Bezek te, “70 he hadì is mibpenamped ku is tindezekelà te menge velad dan wey menge paa zan, ne nekepengimù sikandan te menge mumu ziyà te zizalem te lemisahan ku. Ne ǥuntaan mibeelan te Megbevayà kayi te kedì is mibeelan ku ziyà te kandan.” Mid-uwit dan sikandin diyà te Jerusalem ne ziyè en mebpatey.

⁸Midsurung te menge kevuwazan ni Juda is Jerusalem ne naaǥew zan heini. Migerè dan is menge meǥinged dutun ne mibinsulan dan haazà is inged.

⁹Ne kegkepasad dutun, midsurung dan is menge Canaanhen he meǥinged diyà te menge vuvungan, diyà te Negev, wey is diyà te lugtenaan te menge vuvungan diyà te edsenlepan.

¹⁰Midsurung dan daan is menge Canaanhen he meǥinged diyà te Hebron (he iyan nehuna he ngazan din is Kiriat Arba), ne midhimetayan dan si Sheshai, si Ahiman, wey si Talmai.

¹¹Puun te Hebron, iyan en maan midsurung dan is menge meǥinged diyà te Debir (he iyan nehuna he ngazan din is Kiriat Sefer).

¹²Migkaǥi si Caleb te, “Ibpeesawa ku is anak ku he si Acsa te maama he edsurung wey ebpekaaǥew te Kiriat Sefer.”

¹³Si Otniel he anak ni Kenaz te hazi ni Caleb iyan nekaaǥew zutun te inged. Umbe impeesawa ni Caleb kandin is anak din he si Acsa.

¹⁴Ne hein neked-esawa zan en, midhengyuan ni Acsa si Otniel he ebuyù dan diyà te amey zin te bevesukè dan. Ne zutun midhendiyà si Acsa te ki Caleb, ne hein nekerenè en sikandin puun te asnu zin, ne mid-insaan sikandin ni Caleb ke hengkey is tuyù din.