Zatù 19:15-22

¹⁵Midseled dan dutun te inged ne ziyè dan mebpimpinuu te pelasa, iyan, wazà mibpepemenahik kandan diyà te valey zan.

¹⁶Ne hein mezukilem en, duen sevaha he meǥurang he maama he mid-ulì puun te midterebehuwan din he pemuleey zin. Heini he meǥurang, diyà dengan med-ubpà te vuvungan te Efraim, piru midhalin sikandin diyà te Gibea. Heini is Gibea ragkes te tanà te tribu ni Benjamin.

¹⁷Ne hein naahà sikandan dutun te meǥurang, mid-uvayan din wey mid-insaan din, “Hendei kew ebpuun? Wey hendei kew ebpevayà?”

¹⁸Midtavak haazà is Levihanen te, “Diyè key ebpuun te Betlehem he sakup te Juda ne ed-ulì key ziyà te valey zey he ziyà te vuvungan te Efraim. Wazà midhinggat kenami wey key mekelaus diyà te valey zin.

¹⁹Duen dey egkekaan wey egkeinum kayi te esawa ku wey suluǥuen ku, wey zuen kumpey te menge asnu zey. Umbe wazè en duma he egkinehenglanen dey.”

²⁰Migkaǥi haazà is meǥurang te, “Kenè kew lipezeng kayi te pelasa. Ne ziyè kew te valey ku. Ne iyan ad metau te langun he kinahanglan niw. Kenè kew kayi zà lipezeng te pelasa.”

²¹Ne miduma sikandan dutun te meǥurang. Kebpekeuma zan migkumpayan duen te meǥurang is menge asnu zan. Ne hein nekepasad sikandan he ebpenlùlù te menge paa zan, ne migkaan dan.

²²Dutun te kedlipeylipey zan, midtik-awan liǥuyi te lalung he menge etew zutun te inged haazà is baley ne mibpemukpuk dan is gemawan. Ne mibensaǥan dan sikan is meǥurang te, “Ipeǥawas nu heeyan is meǥeliyug nu he maama su edhilevetan dey sikandin.”