Soukapwüng 19:15-22

¹⁵Iwe, ra rik ngeni Kipea pwe repwe pwinipwin ikenan. Ra tolong lon ewe telinimw o mot lon ewe lenien amwicheich, nge esap wor eman a etiweer lon imwan pwe repwe pwinipwin.

¹⁶Lon ewe chök kuniolun, eman chinlap mwän a liwinto seni an angang lemäl. Wesewesen lenien ewe mwän won chukuchukutän ewe fanü Efraim, nge iei a nom lon Kipea. Nge chon ewe leni chon ewe ainangen Peniamin.

¹⁷Iwe, ewe chinlap mwän a küna ewe chon siamü lon ewe lenien amwicheich o aisini, “Ia ka feito me ie? Nge ia kopwe feila ie?”

¹⁸Nge ewe mwän seni ewe ainangen Lefi a pälüeni, “Äm aia feito seni Petleem lon Juta, pwe aipwe le feila ngeni chukuchukutän ewe fanü Efraim mi toauala, ia üa feito me ie. Üa feila Petleem lon Juta, nge iei üpwe liwiniti leniei. Iwe, esap wor eman a etiwaei lon imwan.

¹⁹A wor rei fetilipwas me enen nöüm aas. A pwal wor pilawa me wain fän itei, fän iten ülüpwülüei me nei we chon angang. Esap wor och am aia osupwang ren.

²⁰Iwe, ewe chinlap mwän a üreni, “Ngang üpwe pwapwa le etiwook lon imwei. Üpwe tümwünü ngonuk meinisin mine ka osupwang ren. Eu chök, kosap annut lon ei lenien amwicheich.”

²¹Iei mine a emwenirela lon imwan, a pwal amongöü nöür kewe aas. Nge ir ra talü pecher, ra mongö o ün.

²²Iwe, lupwen ra pwapwafengen, mwän mi manauangau seni ewe telinimw ra pweli ewe imw o sukuolong asaman. Ra üreni ewe chinlap mwän mine imwan we, “Kopwe atowu ewe mwän mi tolong lon imwomw pwe äm aipwe pwülüeni.”