Yowan 8:2-28

²Ilo iyepe le muntu bongmai koot, motong la imulu a idu a ilo koongoo lono ke bareme mai ke sungunu. Ngan le di tooltool le imot timan pang ye man tigaua a tigaliuu le tiparkat, motong la du iwur, inbe ipatomonai di nga.

³Inbe di pannoongoo ke ger ke Maro tiye di Paresi tikaua garup atu yo iyei bauk, in a timan le man tipatokode dama kidi tooltool tina,

⁴inbe tiwete pang Yesu. Tiyei ne, “Pannoongoo, garup i kerenge, bong tikamata yo iye tamoto san tiyei bauk nga.

⁵Ngan ye ger ke Maro yo iwete pang Mose a iwodo ngan nen, garup atu be iyei dada nen nga, ngan ole takatmate ye pat a imata. Le nookoot nga ole kuwete belei?”

⁶Di kuto maimai tina ngan tiye di Paresi lodi be titoua. Ngan la le titoru nen nga, a nen ngan be Yesu koon kapsap ye betanga sa nga, ngan tiweteweta a tipaposi ye betanga ki tina yo iwete nga. Bong ngan Yesu itur du iwodowodo tana ye baene buruburene.

⁷Ngan ye kene tani in di tooltool tina ngan titor tootoo, le nga itot a imadit le lo ikodo, inbe iwete pang di nen, “Kumata be ang tina ngan atu be taukan noonoo nga, ngan ya la be ikaua pat a ikata garup tani in ye muku i.”

⁸Iwete pang di nen, motong la itur du iwodowodo tana mulu nga.

⁹Ngan tilongo tina yo Yesu iwete nen nga, le nga di atu atu tipases a tidu pang tana. Di tooltool yo maimai ngan timuku, inbe yo kakase paunu nga, ngan titoo di a tidu le tiwulaia Yesu ya taleu iye garup tani in sila ikododo dama ki.

¹⁰Motong la itot a imadit le lo ikodo, inbe itoro garup tani nen, “Garup, di tooltool tina ngan tila ngai koot? Nga yelei a atu kidi iyepe be ipaposong ye urata dook tiap kiong yo kuyeii i, a be nen ngan tiyemenai ong ye, in tiap nga?”

¹¹Ngan garup tani in iyei ne, “Tool mai, tool atu sa iyepe tiap.” Motong la Yesu iwete panga nen, “Au lapau, au i o ke be apaposong ye urata dook tiap kiong yo kuyeii i, in tiap. Le nookoot nga kula ngan kuwulaia dada dook tiap kiong ke yeingi noonoo i.”

¹²Motong la Yesu iwete pang di tooltool tina yo ipatomonai di ngan mulu nen, “Au i la be ayei ben sul pang di tooltool ke tana i. Le kumata sei tool be iman itoo au nga, ngan o ke be ipa todo lono mulu tiap, bong ole ikaua sul ke yepongo dook mata yo taukan motingi i.”

¹³Le nga di Paresi tiwete panga nen, “Ai, ong i nga ong taum kuwetewete ye urata le dada kiong yo kuyei nga sa. Ngan nanga, di tooltool yo tilongo betanga kiong nga, ngan o ke be titara lodi medana ye betanga kiong pitiap yege.”

¹⁴Motong la Yesu iraua betanga kidi nen, “Moolmool, au tauk i awetewete ye urata le dada kiau yo ayei nga, bong di tooltool ke be titara lodi medana ye betanga kiau, yesoo au i lok galanga ye ni yo apa ye a asi i, inbe ye ni yo be amulu a alo pang ye i. Bong ang nga lomim galanga ye ni yo apa ye a asi i, inbe ye ni yo be amulu a alo pang ye i, in tiap.

¹⁵Ang nga be kakarata betanga kidi diemim ye dada kidi yo tiyei nga, ngan katoo dada kidi tooltool ke tana i leu. Bong au tauk i akarata betanga ke tool sa ye dada ki yo iyei nga, ngan tiap.

¹⁶Bong kumata le be akarata betanga ke tool sa ye dada ki yo iyei nga, ngan matin nga le atoo betanga yo moolmool nga leu. Yesoo, au ataleu la akarata betanga, i tiap, bong aye Tamak yo iwangau a asi i, in la amru amyei urata nen i.

¹⁷Ngan ye ger kiang ang tapmim i, in tiwode nen, be di tooltool ru tiwete betanga atu nga, ngan betanga kidi in moolmool.

¹⁸Le kumata be au tauk i awetewete ye urata le dada kiau yo ayei nga, inbe Tamak yo iwangau a asi in ikata suanga ye nga, ngan betanga kiau ngan moolmool.”

¹⁹Yesu iwete nen, motong la di Paresi tina ngan titoru. Tiyei ne, “Tamam yo kuweta i, in iyepe ngai?” Motong la iraua betanga kidi nen, “Ang nga lomim galanga yau tiap, ngan la le lomim galanga ye Tamak tiap nga. Kumata be lomim galanga yau nga, ngan ole lomim galanga ye Tamak lapau.”

²⁰Ngan ye kene tani in Yesu iyepe potai pang ye rumu lono sokalanga yo titar pat ke bareme mai ke sungunu ye i, inbe iwete betanga nga a ipatomonai di tooltool ye. Bong tool sa ikauu a be iparama ngan tiap, yesoo lal ki, in pombe tiao.

²¹Motong la Yesu iwete pang di tooltool tina ngan mulu nen, “Au i be ayegang nga, ngan ole kaserau, bong o kakamatau tiap. Inbe ang nga ole kammata ye noonoo kiang yo kayei nga. Ngan nen le ni yo be alo pang ye i, in ang nga o ke be kalo ye tiap.”

²²Di Yuda tina ngan tilongo yo Yesu iwete nen nga, le nga di tapdi tipartortor a tiyei ne, “Ai, kakamata ole ya taun iraumate a imata, too? Ye punu in la le iwete nen, ‘Ni yo be alo pang ye i, in ang nga o ke be kalo ye tiap’ nga, too?”

²³Di tooltool tina tiwete nen, bong ngan Yesu isootoo betanga pang di a iyei ne, “Ang nga malala kiang naii lopo i, bong au i malala kiau la ete ni. Inbe ang nga ke tana i, bong au i ke tana i tiap.

²⁴Ngan nen la le muku ngan awete pang be ole kammata ye noonoo kiang nga. Le kumata be katara lomim medana pau be Au Tauk I Tool Tani Yo Iyepe Nen I, in tiap nga, ngan ole kammata ye noonoo kiang tina yo kayei nga.” 

²⁵Motong la di tooltool tina ngan titoru nen, “Oo, ngan ong i sei?” Le nga iraua betanga kidi nen, “Au tauk awete ninau pang mukot le se nookoot nga.

²⁶Ngan au i betanga kiau alunu san la be awete a apaposang ye urata dook tiap kiang yo kayei nga. Bong o ayei nen tiap, yesoo Tool yo iwangau a asi i, in betanga ki ngan moolmool. Ngan la betanga yo alongo ye nga, ngan nanga la awete le imot pang di tooltool ke tana i nga.”

²⁷Yesu iwete pang di tooltool tina nen, bong di ngan lodi galanga ye yo nga iwetewete pang di ye Tamana, ngan tiap.

²⁸Motong la iwete pang di nen, “Ye kene yo be kayitmaka Tool Moolmool ke Maro ene ye in nga, ngan ole lomim galanga nen, Au Tauk I Tool Tani Yo Iyepe Nen I. Le au i ayeie so sa ye au tauk lok tiap, bong awete betanga ben tina yo Tamak ipatomonai au ye nga, ngan leu.