Jon 8:2-28

²Na biingbiing saksak, ka tapiek fis sabin na palgan ubiif kale Felun Sising ke aiwa fanu tikii ri ka kiis kawil u ke ka kiis isi fausum ri.

³Foron tom fafausum ini nagogon ke foron Farasi, ri ka lame fakau nenge fifin ae ri tafe u i tel sinangun puur. Ke ri ka fasotih u na famu lo ri.

⁴Ma ri ka diik Iesu le, “Tom fafausum, fifin igii ri tafe u i tel sinangun puur.

⁵Na nagogon kirer, Moses i fas farakrakai ta kerer isi keren luu mete matngan fifin arae. Sanih on use u?”

⁶Ri ka tel matngan fagalte aragii una tata kuun isi Iesu, isi ik mel e tier rin tih lo una tiu Iesu. Isau le Iesu ka parau ma ka tipes sisiit na nanal ini katngan lima.

⁷Aunbiing ri famam diik u biitom, ka sotih torteres ma ka tara sing ri le, “Male tikas lo gam ae biil ti sinang laulau kia, ke ik luu famu u ini tifat.”

⁸Ka parau fis sabin ke ka sisiit na nanal ini katngan lima.

⁹Na aunbiing ri ka ongen ta u i use u aragii, ri ka tipes suuh temtem tikii. Foron tubunkak ri suuh famu, papang na aunbiing Iesu keskes mang turan fifin ae i tih tatom aiwa.

¹⁰Iesu ka sotih fis ma ka diik u aragii, “Tin ier, fiawah mang e fanu aga? Biil tikas i nagogon wo?”

¹¹Fifin ae ka kiliis u aragii, “Ier, biil tikas.” Iesu ka fas u le, “Iau sabin, biil ia nagogon wo. La mang, ke gong sabin o tel sinang laulau.”

¹²Ke Iesu ka orek sabin usuf fanu, ma ka tarah, “Iau tom e malal ken fanu tikii na piklinbat. Seh sau ae i mi lo iau, biil tom in la na kubunor. Biil. Isau le in mel e malal na liu.”

¹³Ke foron Farasi ri ka tara sing i aragii, “Igii o ka famalal fafis wo tom, isau le orek an famalal kiam, biil i tatawin.”

¹⁴Iesu ka kiliis ri aragii, “Taftawa le ia famalal fafis iau tom, orek an famalal kiak i tatawin, wara le ia usum le ia la tingah, ma ian la uwah. Isau le biil gam usum le ia la tingah ma ian la uwah.

¹⁵Gam mi la sau na wolwol ken kaltu tinaga na piklinbat aunbiing gam nagogon, isau le ia biil ia nagogon tikas.

¹⁶Isau, male ian tel nagogon la, ke foron nagogon kiak in tekentu, wara le biil ia keskes ia tel nagogon. Ia tih tura Tata ae i wuun ta iau ugapiek.

¹⁷Na nagogon kimi tom, ri siit ta u le orek ken iu tom e kaltu i tatawin.

¹⁸Iau tom ia famalal fafis iau. Nenge tom fafamalal kiak sabin e Tata, ae i wuun ta iau.”

¹⁹Ke ri ka diik u le, “Fiawah e tamam?” Iesu ka kiliis ri aragii, “Biil gam usum lo Tata ke biil gam usum lo iau. Male gam ka usum tah lo iau, ke gamen usum sabin lo Tata.”

²⁰Ka use foron tier igii aunbiing i fausum fanu na palgan ubiif kale Felun Sising, fatat isi falifuh ae ri luun foron fafen la wah. Isau le biil tikas i luse u, wara le aunbiing kia biil biitom i tapiek.

²¹Iesu ka fas ri sabin le, “Ian la koseng gam, ke gamek im isi iau, ma gamen met ini foron sinang laulau kimi. Falifuh ae ian la ulo, biil i fasih gamen la ulo.”

²²Pesu foron famfamu ken fan Iudaia ri ka diik le, “Arafah, in siimete u tom? I e wara sangan ka tara, ‘Falifuh ae ian la ulo, biil i fasih gamen la ulo?’”

²³Isau le Iesu ka tara biitom aragii, “Gam tina pikli, ma iau tina mawe. Gam tinaga na piklinbat ma iau biil tinaga na piklinbat.

²⁴Ia ka fas ta gam le gamen met ini foron sinang laulau kimi. Male biil gam unune le iau sau e ier ae, ke gamen met tom ini foron sinang laulau kimi.”

²⁵Ri ka diik u le, “Wo seh?” Iesu ka kiliis ri aragii, “Arae tom ia use u la sing gam tin pakanini na tanwara papang igii.

²⁶Ifuun e tier ian use u isi una nagogon gam. Isau le seh i wuun ta iau, i tekentu kanaka. Ma sanih ia ka ongen ta u sing i, ia ka fas ta fanu tikii ini.”

²⁷Biil ri usum le i fasfas ri la ini Tama.

²⁸Pesu, Iesu ka tara aragii, “Aunbiing gam ka fafen ta Kalalik ken Kaltu, namih gamek usum le iau sau e ier ae, ke le biil ia tel ti tier ini wolwol kiak tom. Biil. Isau le ia use sanih sau ae Tata i fas ta iau ini.