Yowan 6:16-40

¹⁶Ye kene tani in tiyepe le du rrai, motong la Yesu di galiunu tidu pang ran koonoo.

¹⁷Tidu, tinam ngan Yesu pombe pang ye di tarai tiap. Motong la tisuku ookoo atu a tiyiri ye, a be tisiutu ran a tila pang Kapenam yo iken ke ran koonoo kapala i, ngan bong oo.

¹⁸Tikooi a tila, ngan eng mai imadit a kokor ki popobe le dook tiap yege.

¹⁹Ngan di galiunu tina, ngan tipie ye ookoo tani a tila kataunu, le manga mooloo kasin. Inbe matadi nen ngan tikamata Yesu yo ipa ran pono a ipot potai pang ye ookoo nga, le nga titattadaii.

²⁰Bong ngan Yesu iwete pang di nen, “Katattadai be! I au tani naii.”

²¹Motong la lodi ponana ye a tikauu a ilo ookoo lono, ngan le pattu leu be ookoo ila isolo ye ni tani yo be tila pang ye i.

²²Tiyepe a bongbongini ki, motong la di tooltool malala mai tina yo tiyepe ran koonoo kapala nga, ngan lodi galanga nen, rono ngan tikamata ookoo ataleu la iken ye ni yo tiyepe ye. Inbe ookoo tani in tikamata touo Yesu pa be iye di galiunu tiyiri ye, nga tiap, bong di galiunu leu la tiyiri ye a tila nga.

²³Motong la ookoo pattu kidi Taibirias tilong le long tisolo potai pang ye ni tani yo Tool Mai iwete lo ponana ki pang Maro ye porong, motong di tooltool tikan i.

²⁴Ngan tina di tooltool tina ngan tikamata touo Yesu iye di galiunu pitiap nga, le nga tiyiri ye ookoo tina ngan a tila pang Kapenam be la tisere Yesu.

²⁵Di tooltool malala mai tina tila le la tipuske Yesu ran koonoo kapala, motong la titoru. Tiyei ne, “Pannoongoo, kuman ni nga ye soo lal?”

²⁶Motong la Yesu iraua betanga kidi nen, “Awete pang moolmool nen, ang nga kaman man kaserau nga, ngan ye mos yo ayeii a iyei ben tarkilanga kiau a kakamata, in tiap, bong ye porong yo apakanang ye a kakan ngan le kapomim sung welewele ye nga.

²⁷Ngan nen le kin urata porang ye kaungu kaningi yo be iwi palbe le dook tiap, in be, bong be nen ngan urata porang ye kaungu kaningi yo be ikaua yepongo dook mata yo taukan motingi i. Ngan kaningi tani in ole Tool Moolmool ke Maro la be ikauu pang i, yesoo Tamana Maro ipootoo be ya la ole iyei urata tani i.”

²⁸Yesu iwete pang di nen, motong la titoru nen, “Nga ole amyei belei a be nen ngan amyei urata ke Maro yo lono dook mata ye nga?”

²⁹Motong la Yesu iraua betanga kidi nen, “Urata ke Maro in nen, be katara lomim medana pang tool yo Maro iwanga a isi i.”

³⁰Iwete pang di nen, motong la titoru. Tiyei ne, “Ole kuyeie soo mos a nen ngan iyei ben tarkilanga kiong pam be amkamata, ngan amtara lomam medana yong i?

³¹Muku ngan di sasa kiam tikana porong yo ene mana in ye ni sorrakene, ben betanga tina yo tiwodo lo ye Rau ke Maro nga. Ngan betanga tina ngan iwete nen, ‘Ya in ikap porong yo ipa ye malala ke Maro, ngan pang di tooltool be tikan.’  ”

³²Motong la Yesu iwete pang di nen, “Mose la ikap porong yo ipa ye malala ke Maro ngan pang di tooltool be tikan, in tiap, bong Tamak la ikap pang di i. Inbe ya la ikaua porong moolmool yo ipa ye malala ke Maro, in pang i.

³³Ngan porong moolmool ke Maro i, in tool yo ipa ye malala ke Maro a isi be si ikaua yepongo dook mata yo taukan motingi i, in pang di tooltool ke tana i.”

³⁴Yesu iwete nen, motong la tiwete panga. Tiyei ne, “Tool mai, be nen nga, ngan kanakana ngan kouo porong tani in pam.”

³⁵Motong la Yesu iwete pang di nen, “Au tauk i la porong tani yo ke yepongo dook mata i. Ngan nen le sei tool be iman yau nga, ngan o ke be pitola mulu tiap. Inbe sei tool be itara lono medana pau nga, ngan o ke be moorooku mulu tiap lapau.

³⁶Bong dawa ben awete pang koot nga, ang nga kakamata gurana kiau oo, bong lomim be katara lomim medana pau tiap.

³⁷Di tooltool le imot yo Tamak ikap di pau nga, ngan ole timan pang yau. Inbe sei tool be iman pang yau nga, ngan o ke be anganga tiap lapau.

³⁸Yesoo, au i apa ye malala ke Maro a asi nga, ngan be si atoo au tauk lok tiap, bong be si atoo Tool yo iwangau a asi, in lono.

³⁹Inbe Tool yo iwangau a asi i, in lono nen, be kin ayege di tooltool yo ikap di pau nga, ngan sa le ilene be. Bong be apamadit di le imot ye lal yo itaru be ikarata betanga kidi tooltool ye i.

⁴⁰Ngan Tamak lono nen, be di tooltool le imot yo titar matadi pang Natunu a titara lodi medana panga nga, ngan ole tikaua yepongo dook mata yo taukan motingi i, inbe ole apamadit di ye lal yo itaru be ikarata betanga kidi tooltool ye i.”