Jon 6:16-40

¹⁶Neget teköiga mare aiga Jisösgö gwarekurupŋi yeŋön o aŋgögö jitŋe geget.

¹⁷Geba waŋgenöŋ öŋgöba gölme mi mosöta o aŋgö kutuba likepŋe Kaperneam mire göröken anget. Angetka miri söŋaum teköiga Jisösnöŋ töndup yeŋgöreŋ qahö asuhuyök.

¹⁸Angetka luhut köhöikŋanök giliga o aŋgönöŋ könöpuk kunduta öŋgöba erök.

¹⁹Öŋgöba eriga lökuatnöŋ qeba naŋgöba 5 me 6 kilomita miaŋgö dop angetka Jisösnöŋ o aŋgö qakŋe tiba tiba waŋge kösutŋe kaiga eka auruba keŋgötporiŋ aket.

²⁰Mewö mötketka kewö jii mötket, “Nanak kazal. Keŋgötŋini kude mötme.”

²¹Mewö jii möta Jisösnöŋ waŋgenöŋ öŋgömapkö jigetka öŋgöyök. Öŋgöiga waŋgeŋinan miaŋgöreŋök ösumok eŋguaŋgita gölme göraŋe anbingö akeri, miaŋgöreŋ aŋgotket. Mewö.

²²Miaŋgöreŋ aŋgotketka miri giaŋiiga ambazip kambu ketaŋi yeŋön o aŋgö likepŋe toroqeba mala kewö mötmöriget, “Uran waŋge mohotŋan tari ehinga Jisösnöŋ gwarekurupŋi yembuk waŋgenöŋ qahö öŋgöba anök. Jisös umbula nanŋinök anget. Waŋge murutŋi kun qahö ehin. Miaŋgöra Jisösnöŋ kunbuk ki malja.”

²³Mewö mötmöriba tosatŋan kewö jiget, “Waŋge mohotnöŋ angetmö, ölŋa, Taiberias taonök waŋge tosatŋi kaget. Waŋge mi Kembunöŋ beretköra saiwap jiiga nemba tarini, mönö gölme miaŋgö kösutŋe kagera Jisösnöŋ waŋge mieŋgöreŋök kunöŋ öŋgöba anök me denöwö?”

²⁴Ambazip kambu yeŋön mewö jiba Jisös aka gwarekurupŋi miaŋgöreŋ qahö miwikŋaim eŋgiget. Mewö eka möta mewöŋanök waŋgenöŋ öŋgöba Kaperneam taonöŋ anda Jisös jaruget. Mewö.

²⁵Ambazipnöŋ Jisös jaruba o aŋgö likepŋe yuke göröken miwikŋaiba eka kewö jiget mörök, “O Ketaŋamnini, gi mönö wani nalönöŋ ki kazan?”

²⁶Mewö jigetka kewö meleŋ eŋgiyök, “Nöŋön keu öl töhönŋi kun kewö jibi mötket: Iŋini aŋgöletot membi ekeraŋgöra aka ni qahö jarum niŋgizemö, nene beret kötuetköbi nemba nem timbireŋ akeri, mönö miaŋgöra ni nuataŋgöba ki kaze.

²⁷Nene ayapkömawi, mi miwikŋaibingöra urukönöp kude aka malmemö, urugö neneŋan malmal köhöikŋi eŋgimakzawi, mönö mia buŋa qem aŋgubingöra kapaŋ köla malme. Iwi Anutunöŋ muŋgem silimbanŋi Suep gölmegö Azi Ölŋi waŋgiiga kukösumŋan walöŋniga ölöp urugö nene eŋgiiga oyaeŋkoyaeŋ akŋe. Mewö aka mal köhöiba kömumba toroqeba teteköŋi qahö malme.”

²⁸Mewö meleŋ eŋgiiga kewö qesim waŋgiget, “Anutugö sihimŋaŋgö dop ahakmeme tandökŋi mönö denöwö ahinga dop kölbawak?”

²⁹Qesim waŋgigetka kewö meleŋnök, “Anutunöŋ azi melaim waŋgiyöhi, iŋini i möt narim waŋgiba malme. Ahakmeme miaŋön mönö Anutu sihimŋaŋgö dop akza.”

³⁰Mewö meleŋniga kewö qesim waŋgiget, “Mewö aiga gi kunbuk wani aŋgöletot kukŋambuk kun menöŋga eka möt narim gihibinak? Gi mönö wani yuai kun Mosesnöŋ ahök, miaŋgö dop aka meman?

³¹Buŋa Kimbi kun kewö ohoget ahöza, ‘Yaŋön Suepnöhök nene beret eŋgiiga neget.’ Keu miaŋgö dop nanine ambösakon yeŋön gölme qararaŋkölkölŋe anda mala nene qetŋi mana nemba malget aka gi mönö könaŋamgi Moses oŋgita denöwö kondelbanak?”

³²Qesim waŋgigetka Jisösnöŋ kewö jii mötket, “Iŋini miaŋgö könaŋi ölöp qahö möt kutuze. Nöŋön keu öl töhönŋi kun kewö jibi mötket: Mosesnöŋ aŋgöletot Toŋi qahö ahök. Yaŋön nene beret mi Suepnöhök qahö eŋgii negetmö, nani Iwinan mönö Suepnöhök beret ölbölŋi eŋgimakza.

³³Anutugö nene beret mi mönö Suepnöhök eta asuhuba gölme dop ambazip malmal köhöikŋi eŋgimakza.”

³⁴Mewö jii möta kewö jiget mörök, “O Kembu, gi nalö dop nene beret mi neŋginöŋga nemba malbin.”

³⁵Jisösnöŋ mi möta jiyök, “Nöŋön malmal köhöikŋaŋgö neneŋi akzal. Kunŋan nöŋgöreŋ kazawi, yaŋön nem timbireŋ aka wösöŋi nalö kunöŋ qahö alma. Kunŋan ni möt narim niŋgimakzawi, yaŋön ogöra qahö kömuma.

³⁶Mewö aigun iŋini ni nek teköba töndup qahö möt narim niŋgize. Mi mönö lök jibi mötze.

³⁷Aka töndup Iwinöŋ ambazip tosatŋi niŋgimakzawi, yeŋön mönö körek nöŋgöreŋ kame. Kunŋan nöŋgöreŋ kamawi, nöŋön mönö i qahö yakörimam.

³⁸“Nöŋön Suepnöhök eta nani imbinaŋgö dop yuai laŋ aka memba malmamgöra qahö asuhuyal. Mewö qahö. Melaim niŋgiyöhi, mönö yaŋgö jitkö dop nup memba malmamgöra eral.

³⁹“Melaim niŋgiyöhi, yaŋgö jitsihitŋan kewö ahöza: Yaŋön ambazip nöŋgö böröne al eŋgiiga maljei, nöŋön mi pakpak köyan köl eŋgiba malbiga yeŋgöreŋök kunŋan kun qahö sohoba ayuhuma. Qahö ayuhugetka nöŋön i nalö ketaŋe eŋgömindiba mem gulim eŋgimam.

⁴⁰“Iwinaŋgö jitsihitŋan kewö ahöza: Tosatŋan Nahönŋi eka möt narim waŋgizei, yeŋön körek nalö kewöŋe letota malmal köhöikŋi buŋa qem aŋguba malme. Mewö mal kömugetka nöŋön i nalö ketaŋi miaŋgöreŋ eŋgömindiba mem gulim eŋgimam.”