Ioanej 6:16-40

¹⁶A lao jautik pena, japwilim a tounpadak kan ap kotilan ni oror,

¹⁷Kereda pon jop pot, kotela kokolan Kapernaum. A lao waja ponier, Iejuj jaikenta ian irail.

¹⁸A jed me iluken, pwe an me ma.

¹⁹Irail jeijei kila mail eijoklimau de rieijok, rap kilanada Iejuj a kotikotido pon jed koren ion jop, irail ap majapwekadar.

²⁰A kotin majani on irail: Nai i komail der majak!

²¹lrail ap men kajamo i pon jop o, a jop o madan milar ni jap o, me re ko on ia.

²²A mandan ran o pokon o, me mi palilan le, lao kilaner, me jota apot jop mi waja o, pwe i eta, me japwilim a tounpadak kan keredan poa, o me Iejuj jota ian japwilim a tounpadak kan kotidan pon jop o, pwe a tounpadak kan kola kelep.

²³A pil akai kijin jop me pwarado jan Tiperiaj, tana don waja o, me re manamana ia, murin Kaun o kotin laolao.

²⁴Aramaj akan lao kilaner, me Iejuj jolar kotikot ia, o japwilim a tounpadak kan pil jo, rap dake jop pot kolan Kapernaum, raparapaki Iejuj.

²⁵Irail lao diaradar i palilan le, ap potoan on: Rapi iad me re kotido?

²⁶Iejuj kotin japen irail majani: Melel, melel I indai on komail, komail kin rapakin ia kaidin pweki kilel akan, me komail kilan, a pweki komail kanala kijin prot ap metier.

²⁷Komail der dokki mana, me kin ola, a dokki mana me kin mimieta on maur joutuk, me Nain aramaj pan ki on komail, pwe i me Kot Jam kileledier.

²⁸Irail ap potoan on i: Da me jen wiada, pwen kapwaiada en Kot a dodok kan?

²⁹Iejuj kotin japen majani on irail: Iet en Kot a dodok: Komail en pojon i, me a kadarado.

³⁰Irail ari potoan on i: Kilel da, me re kotikida, pwe jen kilan o pojon ir? Da me re kotin wiada?

³¹Jam at akan me kanala mana nan jap tan o, duen a intinidier: A kotiki on irail prot jan nanlan, en kanala.

³²Iejuj ap kotin majani on irail: Melel, melel I indai on komail, kaidin Mojej, me ki on komail prot jan nanlan, a Jam ai kin ki on komail prot melel jan nanlan.

³³Pwe me kodido jan nanlan, o ki on jappa maur, iei prot en Kot.

³⁴Irail ap indan i: Main, kotiki don kit prot wet kaukaule!

³⁵Iejuj kotin majani on irail: Prot en kamaur nai, me ko don ia jolar pan men manadar, o me pojon ia, jolar men nim piladar.

³⁶A I indai on komail er, komail kilan ia er, ap jo pojon la.

³⁷Karoj me Jam ki on ia, pan ko don ia, a me ko don ia, I jota pan kajela.

³⁸Pwe nai kodido jan nanlan, kaidin pwen wiada injen ai, pwe kupur en i, me kadar ia do.

³⁹Pwe iet kupur en me kadar ia do, karoj me a ki on ia er, I ender kajela amen, pwe I en kamaureda ni ran nik o.

⁴⁰A iet kupur en Jam ai, amen amen, me kin kilan Na o pojon i, en aneki maur joutuk, a I pan kamaureda i ni ran nik o.