Yoni 21:2-16

²Simona Pita, ma Tomasi (tauna gowana hi pa, Natulagalaga), Nataniyela lawa Kanagei, Galili tuponana, ma Sebedi natunatuna luwaga, ma a hewahewali luwaga gasi.

³Simona Pita i baha uyahihi i pa, ‘Tau a nenae an’ebaga.’ Hi baha uyahina hi pa, ‘Apo boluta ta negogona.’ Hi nae po wam uyahina hi gelu, ma hai hagida hi teleneya, po didibalana ega kikina iyana gehouna hit’onaya ma a sigana malitom.

⁴Malatomtom kikina, hi gagalena gae, ma Yesu hoi gadowa i towotowolo. Ma ega hita hanapugeya, hai nugotuhu hi pa, ‘Iyai?’

⁵Yesu i otu hopu uyahihi i pa, ‘U lawa, iyana bo ega?’ A baha hi wimiheya hi pa, ‘Eega.’

⁶Ma i otu hopu meme i pa, ‘Ona tuhopu ma u awala hinebawamiyei hagida ona telenena meya, yaka iyana apo ona wialoni.’ Ega yaka hagida hi teleneya po iyana hi ononaya i maga wahaga, po ega emoemotahi hagida hina nouya.

⁷Hewalina Yesu i lauhogaleya i baha nae Pita uyahina i pa, ‘Hei, ata Guyau!’ Simona Pita i noonola ma i pa, ‘Ata Guyau,’ mala emosi ma a kaleko i oteni, babana i ebebaga binei ma i houni po i memae, ega yaka i lupa hopu hoi boga.

⁸Gehouhi wam uyahina hi memae, hagida anai iyanana hi woe teini po hi gae hoi hayahaya, ega bala ita dao, babana guli magouna 60.

⁹Hi gae po hoi gadowa hi gota, ma mayau ononiyana uyahina iyana hi memae, ma palawa mayouna u liyaliyana hi memae.

¹⁰Yesu i baha nae uyahihi i pa, ‘Amalai iyana o ununihi gehouhi ona neihinimai.’

¹¹Ega yaka Simona Pita i gelu hoi wam po hagida i pili po i gae hoi hayahaya. Ma iyana balubaluhi hi onahi magouhi 153, ma hagida ega hita loloya.

¹²Yesu i baha uyahihi i pa, ‘Ona nei po tan’am.’ Ma a hewahewali hi hanapugeya tauna Guyau ma tamogi hi witutubaha hi pa, ‘Guyau bo lawa tapuna?’

¹³Yesu palawa i waya po i welehi ma iyana naka pitenana.

¹⁴Yesu mala luwaga i lugeleteya uyahihi, ma geka i witonugaya a towolo memena uyahina.

¹⁵Malatomtom amna hi’mam, ma Yesu i baha nae Simona Pita uyahina i pa, ‘Simona, Yoni natuna, tam iyowai, u luhogalena dumau ma apoma om bagibagi, bo?’ Pita i pa, ‘Ee Guyau, u hanapugeu tau a luhogalem.’ Yesu i baha i pa, ‘U sipi muhomuhohi una wianihi.’

¹⁶A bahana i wiluwagaya i pa, ‘Simona Yoni natuna, u luhogalena dumau?’ Simona i pa, ‘Ee, Guyau u hanapugeu a luhogalem.’ Yesu i baha i pa, ‘U sipi una galena itetehi.’