Yohana 21:2-16

²Simoni Petili na Tomasi yachemigwe mnyambili na Natanaeli mwenyeng'haye wa Kana isi ya Galilaya na wana Sebedayo weli na walanguswa wa Yesu weli wali wekale hamwe.

³Simoni Petili nakawalonjela wayage, “Ndanguluta kulowa somba.” Hewo nawamlonjela, “Toluta hamwe,” Ahyo waluta wali muitumbwi waluta, ila hawebate ne somba nechilo yeng'ha.

⁴Zuwa vyolyali lilawila, nawamona Yesu yemile hafungo ha ilamba, ila walanguswa hawavizelele kota nayali heye.

⁵Hamba Yesu nakawauza, “Wasongolo, hamlowile ne somba?” Nawedichila, “Hebu! Ne chinhu.”

⁶Yesu nakawalonjela, “Mtoze utandawala kudilo mwa itumbwi mochibata somba.” Hewo wadita kota vyoyawalonjele, watoza utandawala naumema somba, nawali wolemwela kukwega utandawala vyoumemile somba nyinji.

⁷Baho mlanguswa yaganigwe na Yesu nakamlonjela Simoni Petili, “Ayu ndo Mkulu.” Petili vyoyahuliche kota nayali Yesu, kavala nguwo ya heye kwa vila nayali hanavala, na baho kenjila kuli malenga.

⁸Ila wala walanguswa wanji nawoya mli itumbwi akuno wokwega utandawala umemile somba. Hawawele kutali na hafungo, kwali utali wa kota magulu miya.

⁹Vyowafichile hafungo, wachona chiluli cha makala na mchanya hake hawichigwe somba na mibumunda.

¹⁰Baho Yesu nakawalonjela hewo, “Migale somba nyhefu zo mibate sambi.”

¹¹Simoni Petili kakwina mli itumbwi, kakwega utandawala umemile somba kufungo, kwali na somba ng'hangala zifichile miya na makumi gahano na zidatu. Hanga na somba zeng'ha azo, utandawala haudejeche.

¹²Yesu nakawalonjela, “Muye mulye.” Kuduhu ne mlanguswa yumwe yajezile kumuuza, “Kwa whaani?” Kwa vila nawavizela kota nayali Mkulu.

¹³Yesu nakaluta, kalavya ibumunda, kawapa. Kahi kadita hiho kwa zila somba.

¹⁴Ahi kahi nayali lwa kadatu Yesu kuwalawila walanguswa, kulawa vyo yazilipuche.

¹⁵Vyowasindile kulya, Yesu nakamlonjela Simoni Petili, “Simoni mwana Yohani, kwangungana ng'hatu kusinda awa?” Petili nakedichila, “Ena Mkulu, hegwe kuvizela kota ndangukugana.” Yesu nakamlonjela, “Ulolele wanaming'holo ja heni.”

¹⁶Yesu nakamlonjela kahi, “Simoni mwana Yohani, kwangungana ng'hatu?” Petili nakedichila, “Ena Mkulu, hegwe kuvizela kota ndangukugana.” Yesu nakamlonjela, “Ulolele goya ming'holo ja heni.”