SAN JUAN 21:2-16

²Jme₁tion'₅₄ co₂lë₅ Si₂mu₅₄ Pe₄; To₁má₄, i₂të́'₂ dsa₂ Dsa₂ Tsɨn'₅₄; Natanael i₂chan₂ juɨg₂ Caná ja₁tén₄ 'uë₃ Galilea; le₃on₃ ja₁ŋi'₅₄ Zebedeo në́₃; quiain'₅₄ on₃ guë́₄ chi'₂ dsɨ₂guia₃-tɨ́n₂ sián'₂ quián₅ Jesús.

³Jaun₂ ca₂juá'₂ Si₂mu₅₄ Pe₄: ―Nei₅₄ i₁cháng'₃ ju₄. Jaun₂ ca₂ŋag₃ 'éi₂: ―Ján₃ bá₄ dsau₅₄ jnia'₅₄ quian'₅₄ 'ne₂. Jaun₂ i₃léin₂, ca₂uɨ́g₂ 'ŋió'₃ caun₂ tsɨ₁mu₅, la₁ a₂'uë₂ jaun₂ tsá₃ ju₄ ca₂join₃ 'i₁jan₂.

⁴Jme₁ca₂jnia₃ táng₃ jaun₂, jaun₂ jme₁chén'₄ Jesús chei'₅₄ jmɨ₁ŋí'₄, la₁ tsá₃ jaun₂ ŋi₅ chi'₂ dsɨ₂guia₃-tɨ́n₂ jŋia'₅₄ Jesús bá₄ 'éi₂.

⁵Jaun₂ në́₃ ca₂juá'₂ Jesús: ―'Nia'₂ chi'₂, ¿tsa₁ ju₄ chan₂ quián'₂ 'nia'₂? Jaun₂ ca₂ŋag₃ 'éi₂: ―Lia'₂ 'i₁jan₂.

⁶Jaun₂ në́₃ ca₂juá'₂ Jesús: ―Tiong₂ 'nia'₂ 'má₅ quiáng'₂ të₂le₃ gu₂ ne₁ tsɨ₁mu₅, jaun₂ join'₅₄ 'nia'₂. Jaun₂ le₂jaun₂ bá₄ ca₂jmo₃. Jme₁co₂lág₂ jaun₂ tioin'₅₄ tsá₃ lé₂ dsí₃ tsɨ₁'má₅ dsi₂jmɨg₂, ia₁ a₂ŋɨ́₄ lë₃ juɨn₅ i₁ju₁ jme₁tion'₅₄ 'ŋió'₃.

⁷Jaun₂ në́₃ ca₂juá'₂ chi'₂ dsɨ₂guia₃-tɨ́n₂ i₂jme₁'nio₃ Jesús guë́₄ lɨn₃, ca₂tsɨ́'₃ Pe₄: ―¡Te₁gui'₅₄ bá₄ ó₃! Jë₂ bá₄ con'₂ ca₂nág₂ Si₂mu₅₄ Pe₄, Te₁gui'₅₄ bá₄ 'éi₂, ca₂quɨ́'₂ tsɨn'₅₄ jang₄ le₃co'₅₄ (ia₁ jme₁ma₂në₂jŋiá'₂ a₂jme₁jmo₃ ta₁) jaun₂ ca₂tiáin₂ dsi₂jmɨg₂.

⁸Chi'₂ dsɨ₂guia₃-tɨ́n₂ rɨin'₅₄ guë'₂ në́₃, ca₂dsi₃lein₃ bá₄ të₂ chei'₅₄ jmɨ₁ŋí'₄ quian'₅₄ tsɨ₁mu₅ qui₂tsɨ₂cuɨ́n'₅ tsɨ₁'má₅, ca₂lia'₂ rë₂can'₂ ju₄. Ia₁ tsá₃ uɨ́ng₂ jme₁tioin'₅₄ ja₁lë́₄ chei'₅₄ jmɨ₁ŋí'₄: con'₂ caun₂ 'ŋiá₂-láu₂ metros bá₄ jme₁tí₄.

⁹Jme₁ca₂sióin₃ 'uë₃ në́₃, ca₂jág₃ a₂ma₂niog₅ si₂ tá'₃, ján₃ bá₄ jme₁ma₂dsɨ́n₂ jan₂ ju₄ ne₄ si₂; ján₃ bá₄ jme₁te₁'i₁ i₁ŋí'₄ në́₃.

¹⁰Jaun₂ ca₂juá'₂ Jesús: ―Jŋia₅ jan₂-on₃ ju₄ i₂lia'₂ në₂chan'₂ 'nia'₂.

¹¹Jaun₂ ca₂uɨ́g₂ Si₂mu₅₄ Pe₄ guei'₅₄ tsɨ₁mu₅. Jaun₂ ca₂tsë́'₃ tsɨ₁'má₅ ca₂të₂ chei'₅₄ jmɨg₂ lia'₂ rë₂can'₂ tion'₅₄ ju₄ ca₁can'₅₄. Con'₂ caun₂ 'ŋiá₂-lón₂ rë₂dsɨ́₂ të₂láu₃-guia₃-ún₂ (153) ju₄ jme₁tion'₅₄. La₁ o₁jŋia'₅₄ la₂ juɨn₅ ju₄ jme₁tion'₅₄, tsá₃ ca₂gag₂ bá₄ guë́₄ tsɨ₁'má₅.

¹²Jaun₂ ca₂juá'₂ Jesús ca₂tsɨ́'₃ chi'₂ dsɨ₂guia₃-tɨ́n₂: ―I₂nó'₅ 'nia'₂ i₂qué'₂ má₃ të₂ o₃'iog₂. Jaun₂ lia'₂ 'i₁jan₂ chi'₂ dsɨ₂guia₃-tɨ́n₂ tsá₃ tiá₂ dsɨ́₅ ŋag₃ i₂'ein₂ 'éi₂, ia₁ ŋi₅ bá₄ jaun₂ Te₁gui'₅₄ bá₄ 'éi₂.

¹³Jaun₂ në́₃ ca₂jme₃quián₃ Jesús, ca₂can₃ i₁ŋí'₄, jaun₂ ca₂cuë́'₃ chi'₂ dsɨ₂guia₃-tɨ́n₂. Ján₃ bá₄ le₂jaun₂ ca₂jmo₃ quian'₅₄ ju₄.

¹⁴A₂në₅ jë₁ca₂të́₂ 'nag'₂ ráun₂ a₂ca₂jme₃jnia₅ Jesús ne₄ chi'₂ dsɨ₂guia₃-tɨ́n₂ quiáin₅ cang₂ jme₁ca₂jein'₅₄ ja₁jme₁rë₂'lɨin₅₄.

¹⁵Cang₂ jme₁ca₂lë₃ guë́'₅ má₃ të₂ o₃'iog₂, ca₂ŋag₃ Jesús ca₂ŋɨ́i'₃ Si₂mu₅₄ Pe₄: ―Si₂mu₅₄, ja₁ŋi'₅₄ Juan₅₄, ¿dsau₅ 'nióg'₃ jniá₂ lia'₂ con'₂ guë́₄ dsa₂ tión₂ la₂? Jaun₂ ca₂ŋag₃ Pe₄: ―Ján₅, Te₁gui'₅₄. Ŋi'₅₄ bá₄ 'ne₂ jaun₂, a₂'nió₃ jniá₂ 'ne₂. Jaun₂ ca₂juá'₂ Jesús: ―Jme₁tan₅₄ guein₂ já'₂ cha'₂ quiáng₃ jaun₂.

¹⁶Jaun₂ ca₂ŋag₃ táng₃ Jesús jë₁ca₂të́₂ táng₃ ráun₂: ―Si₂mu₅₄, ja₁ŋi'₅₄ Juan₅₄, ¿'nióg'₃ jniá₂? Jaun₂ ca₂ŋag₃ Pe₄: ―Ján₅, Te₁gui'₅₄. Ŋi'₅₄ bá₄ 'ne₂ jaun₂ a₂'nió₃ jniá₂ 'ne₂. Jaun₂ ca₂juá'₂ Jesús: ―Jmo₄ 'í₁ já'₂ cha'₂ bë'₅₄ quiáng₃ jaun₂.