San Juan 21:2-16

²Orzeꞌ zeꞌ yuꞌ tublaazh la be de yu nu rsyaꞌ lom. Zeꞌ zu Simo̱o̱ Bed, nu Tomaas, yu nu rnii dey cuach, gal nu Natanael, yu nu bruu Caná, tub gyedz nu ri lo yu ni Galilea, gal nu ya̱ nu bicya̱ Santiag, de̱ ya̱ nu nac iꞌñ Zebedeo, gal nu se cyup mbecy nu rsyaꞌ lo Jesuuz.

³Orzeꞌ na Simo̱o̱ Bed rab yu deꞌ zir de̱: ―Ya̱ cha̱ guuz bel ―nay. Orzeꞌ na dey rab yu Bed: ―Niꞌ de̱ ya̱ cha̱ du̱ ru ―na dey. Orzeꞌ brush nez de̱ za̱. Orzeꞌ guꞌ de̱ nañ tub barc. Gua la rel byub de̱ bel tees ni tub ma wangad ma.

⁴Na ornu bi brugyiꞌ nu bi yad nu rzaꞌ yu, orzeꞌ bruꞌña Jesuuz gusub mi ruꞌ nisyudoo. Tees de̱ ya̱, yu nu rsyaꞌ lom, wangyuꞌ lo de̱ mi.

⁵Orzeꞌ nam rab mi de̱: ―Der yu feñ, ¿a wangad la bel ni der? ―nam. Orzeꞌ mne̱e̱ de̱: ―Rila wangad ma ―mne̱e̱ de̱.

⁶Orzeꞌ na gaꞌ Jesuuz rab mi de̱: ―Orzeꞌ mneꞌ der gyish zeꞌ par bee barc gun orzeꞌ gad ma ni der ―nam. Orzeꞌ mneꞌ de̱ gyish zeꞌ lo nis, nunu par nu tonaꞌ la zañ bel guꞌ ma nañ gyish ne̱ de̱, orzeꞌ ni wagacaꞌ nu loo de̱ ñii lo nis nu cshup de̱ ñii nañ barc.

⁷Orzeꞌ ya̱, yu nu rsyaꞌ lo Jesuuz nu dzi razañ lagy mi zeꞌ, mne̱e̱ lo Bed: ―¡Laab Jesuuz, biñ nu nac Shuaan den! ―Mne̱e̱. Laab güeñ la Simo̱o̱ Bed nu laab mi zeꞌ Shuaan den, orzeꞌ bzuy shab yu gun a̱ꞌ zuy shab yu. Orzeꞌ bet lay lo nis zay.

⁸Orzeꞌ deꞌ zir de̱ ya̱, losaꞌy, gal ri ziꞌl de̱ nañ barc rgayu̱ tuñ la de̱ gyish nu yuꞌ bel zeꞌ. A̱ꞌ zet zaab barc lo nis. Nu rnii tub gaynal gaal metr nu zet nu zaab ñi lo nis.

⁹Na ornu bru̱u̱ de̱ nañ barc par lo yu bigy, orzeꞌ bzaac de̱ nu bi nguaa gyi nunu riib tub bel loñ. Nunu nguaa gaꞌ gyishtily.

¹⁰Orzeꞌ na Jesuuz rab mi de̱: ―Da nu der la be bel, bañ nu sa bdub der na ―nam.

¹¹Orzeꞌ Simo̱o̱ Bed guꞌy nañ barc. Bduꞌ yaay gyish nu yuꞌ de bel zeꞌ. Bgaꞌ yu tuñ lay ñi za nuy ñi par ruꞌ nisyudoo. Dza la nañ ñi yuꞌ du ub bel ily la. Yuꞌ tub gaynal nu̱ zub chon bel zeꞌ nac ma. Mas tonaꞌ la bel zañ yuꞌ nañ gyish zeꞌ, tees wanshaañ.

¹²Orzeꞌ na Jesuuz rab mi de̱: ―Gyeed der gun gyicy ru siily ―nam. Tees ni tub la de̱ wanric de̱ baloor nu ndugyi̱ꞌ de̱ lom ben cyu nac mi, gun gud lagy de̱ nu laab mi, ndeꞌ Shuaan de̱.

¹³Orzeꞌ Jesuuz bechaꞌm lo de̱. Orzeꞌ bduꞌ yaam gyishtily zeꞌ. Briic mi ne̱ de̱. Orzeꞌ niꞌ ziꞌl bicy num de bel zeꞌ.

¹⁴Orzeꞌ ndeꞌ tir chon nu bzaac de̱ Jesuuz despuees ornu bi byabañ mi.

¹⁵Na ornu blazh bicy de̱ siily, Jesuuz nam rab mi Bed: ―Simo̱o̱, iꞌñ Jonás, ¿a rca zir ru ya̱, gazeꞌ gal mod nu rca deꞌ zir de yu ii ya̱? ―nam. Orzeꞌ na Bed: ―Laab Shuaana̱, ru rad lagy ru nu rca̱ ru ―nay. Orzeꞌ na gaꞌ Jesuuz: ―Orzeꞌ mña de mbecy nu nac shily ne̱ ―nam.

¹⁶Orzeꞌ mnii gaꞌm tir cyup la loy. Orzeꞌ nam: ―Simo̱o̱, iꞌñ Jonás, ¿a rca zir ru ya̱, gazeꞌ gal mod nu rca deꞌ zir de yu ii ya̱? ―nam. Orzeꞌ na gaꞌ Bed rab yum: ―Laab Shuaana̱, ru rad lagy ru nu rca̱ ru ―nay. Orzeꞌ na gaꞌ Jesuuz: ―Orzeꞌ mña de mbecy nu nac shily ne̱ ―nam.