Zone 21:2-16

²Ari Saimone Pita, e Tomasi sapu ta pozae Vivi, e Nataniela sapu mae guana pa Kena pa popoa Qaleli, meke sari na tuna e Zebeti, meke sari karua disaepeli pule si koa varigara dia.

³Meke zama la koa rini se Pita, “Tala habu qua si rau,” gua si asa. Meke zama la koasa sarini, “Gami ba hiva luli mami tugo koa goi,” gua si arini. Ke la suraṉa si arini pa keke koaka meke topue la, ba koasa boṉina asa si namu na loketoṉa hokara si vagia rini.

⁴Sipu vaqavaqasa sa popoa, si mae turu Nana pa masamasa se Zisu, ba lopu hite gilania ri kasa disaepeli sapu e Zisu mo si Asa.

⁵Ke nanasa la si Asa koa rini, “Kasa Qua baere, vegua vagi igana tugo si gamu?” Olaṉa si arini, “Lokari, namu lopu keke,” gua si arini.

⁶Ke zama si Asa, “Ego, mi ipania sa vaqara pa kali mataona sa koaka, meke kaqu vagi si gamu,” gua si Asa. Ke ipania rini sa vaqara meke lopu boka kave vura nia rini, sina na siṉia na igana si asa.

⁷Meke zama la koe Pita sa disaepeli sapu tataru nia Zisu, “Sa Baṉara si isa,” gua. Sipu avosia tugo Saimone Pita sapu sa Baṉara si isa, gua, si va sage pulea sa sa nana poko doduru, ura ele va gorea sa sa nana poko doduru asa totoso habu rini, meke hoqa gore la pa kolo meke gore la koe Zisu pa masa.

⁸Meke qelu gore la pa masa sari kasa disaepeli pu koa koasa koaka, meke kavea rini sa vaqara sapu siṉia na igana. Na lopu seu sisigiti pa masa si arini, guana lima ṉavulu ṉava mo seu gua.

⁹Meke sipu kamoa rini sa masa, si dogoria rini si keke nika motete lerana sapu hakea na igana, meke kaiqa bereti.

¹⁰Meke zama la koa rini se Zisu, “Paleke mae kaiqa igana saripu tiqe habui gamu,” gua si Asa.

¹¹Meke suraṉa pule la pa koaka se Pita, meke balu gore la nia pa masa sa vaqara, sapu siṉia na igana nomadi, padana keke gogoto lima ṉavulu ṉeta ninaedi sari doduru. Soku hola ba lopu hite boka rikata sa vaqara.

¹²Meke zama la koa rini se Zisu, “Mae gamu mamu henahena paki,” gua si Asa. Ba loke tie ri kasa si ona hiva nanasia si Asa, “Esei si Goi?” sapu gua, sina na doṉo gilania dia rini sapu Asa tugo sa Baṉara.

¹³Meke mae se Zisu, meke vagi Sa sari na bereti meke vala ni Sa koa rini meke tavete kekeṉoṉo guni ni tugo Sa sari na igana.

¹⁴Hiera tugo sa totoso vina ṉeta sapu la vata dogoro se Zisu koari na disaepeli pa mudina sa Nana tinuru pule pa minate.

¹⁵Meke sipu beto henahena rini, si zama la koe Saimone Pita se Zisu, “Saimone, tuna e Zone, vegua, tataru zoṉazoṉa Nau tugo goi, hola nia sa tataru tadirini sara,” Meke olaṉa se Saimone, “Uve, Baṉara, gilania Mua sapu tataru nigo rau,” gua si asa. Meke zama se Zisu, “Mu poni sari na Qua lami,” gua si Asa.

¹⁶Meke nanasa pule la tugo koa sa se Zisu pa vina rua totoso, “Saimone, tuna e Zone; tataru Nau tugo goi si Rau?” Meke olaṉa se Saimone, “Uve, Baṉara, gilania Mua Goi sapu tataru nigo rau.” “Ego, mu kopu ni sari na Qua sipi,” gua se Zisu.