YONI 20:5-18

⁵E, gayemu gaꞋiboꞋula galukenala, kaleko kwayakwayana hifafana mededemagaga gidauda-ma gaꞋitana.

⁶Tu Saimoni-Fita wai gimulina. Giyemu tomohuyehuyeya giluku au kaleko kwayakwayana gidauda-ma giꞋitana, kadu kaleko Yesu uꞋuna ana lifi giꞋitana medema keke kaleko kwayakwayana buye seꞋeyaine gidadauda, au uwaꞋuwana tulina gidauda.

⁸Tu iyaꞋeku ma tomohuyehuyeya wai ganagona-ma au galuku gaꞋita-yo nuwahinagekuya gavetumagana gagayo, “Wona velemona gimididi-havagi.”

⁹Tu medema tovai-nadi Yaubada bonana higa Yesu yana mididi-havagi faꞋina tuwai-moꞋena hiꞋetoladina amanadi, aimo keke adahalamane-hagihagiyeni.

¹⁰Ada au amaꞋiselu alowoga ana yama manuweya.

¹¹Tu Meli a giyewana tomohuyehuyeya, ada kabuꞋavane gimidimidi tu gitagitagi. Ada aimo gitagitagi tu gina giꞋiboꞋula tomohuyehuyeya be gilukenala, au lobama ana tovenuwaꞋata luhei giꞋitadi adi vaigau kwayakwayana, ada Yesu wowona boi gidauda-ma againe hihiyoto. SaꞋeyana Yesu waꞋuꞋune gihiyoto, saꞋeyana waꞋagene gihiyoto.

¹³Ada tovenuwaꞋata saꞋeyana Meli gigahena gigayo, “Kwamayoku, gavadi-yo utatagitagiya?” Bana gigayo, “Yaku Kaiwabu wowona hinauwena tu hai hiseni ma keke gadahalamaneni.”

¹⁴Gigahe-yo gidaꞋenovilana ma Yesu giꞋitana tu gifaniyena, givaita Bana faha ana toꞋitaveꞋavina.

¹⁵Tu Yesu gigayo, “Kwamayoku, gavana faꞋina utagitagiya? Hakwadi uleleleni?” Au Meli gigayo, “Kauveya, kaꞋi yaku Kaiwabu wowona O unauwena, hai useni ma unahawavemogatalena be ganana ganavaina ada gananauwena.”

¹⁶Au Yesu bana ana egana giyakahina gigayo, “Meli.” Ada gihagavilana Hibeliu meyameya gigahena gigayo, “Laboni.” Hifufu ana kaivila ma “Aku Tovehawala.”

¹⁷Yesu gigayo, “Keke unaꞋabiku, faꞋina aimo keke Kamaku againe gadalaka tu tobohiyakweyao agaidiya unana Iya faꞋikuya unagahedi Iya ganalaka Kamaku againe, BanaꞋe kadu omi Tamami, e yaku Yaubada kadu yami Yaubada.” Hidedemi Yesu gigahe.

¹⁸Au Meli vineMagidala giꞋela ime tomuliya agaimeya gigahe gigayo, “Kaiwabu a gaꞋitana.” Kadu Yesu yana gahe matatabuna giꞋawatalatalainena ime agaimeya.