Jon 20:5-18

⁵Hi hitehɨr herenaan hɨr laplap mɨwaai te hi ap hen nɨmɨn en au.

⁶Saimon Pita kɨkaru kan kewenayipɨr. Hɨrak ken kekre han eik kɨr laplap yaaim mɨwaai en.

⁷Hɨrak kɨr laplap nɨpaa hɨrakɨt mɨtɨkɨt wik tewisɨm teiyɨm teweikɨn paan ke Jisas keriuwerem. Hɨram ap mɨwaai metike laplap ham au. Hɨram miutɨpen mɨwaai ham, hɨrak Jisas keweiknenim mɨwaai meit.

⁸Pita ken nɨmɨn en epei au, hi mɨtɨk disaipel hak kerek hi hinɨn han hiun han kewen kɨnɨk eik, hi hisesik hɨr menmen te hi hertei Jisas pɨke kekrit.

⁹Nɨpaa ere wɨ im em, mɨt wen nepɨtari hɨm me God mekre tɨwei hɨram matɨp mar im: “Hɨrak pɨke kakɨkrit kaku kakɨt.”

¹⁰Hawɨr wɨrek epei au, hawɨr pɨke wen nawɨr en.

¹¹Maria wan werp han werp witeik witehɨr wɨwaainaan wɨkɨtek. Hɨre wɨkɨtek, hɨre witehɨr werenaan.

¹²Te hɨre wɨr mɨtɨkɨt ensel wik teriuwet laplap me hike tau yeno kerek nɨpaa Jisas herwe yɨnk kɨrak kɨwaairi, kiutɨp kau yeno paan, kiutɨp kau yeno me hɨt.

¹³Hɨrakɨt titɨwehi tar ik: “Mɨte, ti henmak te ti hɨkɨt?” Hɨre wetpɨwekɨt, “Mɨt epei neit herwe yɨnk ke Mɨtɨk Iuwe kai neiyɨk nen wit hak, te hi hepɨtari hɨr newisɨk keit nein.”

¹⁴Hɨre watɨp epei au, hɨre weweikɨn wɨr Jisas kerp menep te hɨre wepɨtari hɨrak Jisas.

¹⁵Jisas kitɨwehi kar ik: “Mɨte ti henmak te ti hɨkɨt? Ti hɨnhatɨn keimɨn?” Hɨre han kitet hɨrak mɨtɨk kerek naanmɨpre ni, te hɨre wetpɨwek, “Mɨtɨk, ti heit yɨnk kɨrak hewisɨk kɨwaai wit hak ti etpau te hi ano etɨwek.”

¹⁶Jisas ketpɨwe, “Maria.” Hɨre weweikɨn wɨkɨamnaan wɨrek, te hɨre wenke hɨm me Isrel wetpɨwek war ik: “Rabonai.” Hɨram matɨp tisa.

¹⁷Jisas ketpɨwe kar ik: “Ti ap etenɨna au emɨt. Hi ap han hɨr Haai kai wen au. Ti eno atɨp nai yinan mɨt disaipel har ik: ‘Hi ano ahɨrek kerek hɨrak Haai kai, Haai ki, God kai, God ki.’”

¹⁸Hɨrak katɨp epei au, Maria pe Magdala pɨke wen watɨp mɨt disaipel me menmen hɨre watɨp, “Hi epei hɨr Mɨtɨk Iuwe.” Te hɨre wetpor hɨm kerek hɨrak nepei ketpɨwerem.