Jon 20:5-18

⁵Ga heraro laka uram ta ira katona maal diet ga noh taar kaia, iesen pa ga laka.

⁶Io, Saimon Pita um nong ga murmur haan tana ga me hanuat gaam haan laka tano midi. Ga nes ira katona maal diet ga noh taar kaia tika ma no maal na haratur di ga pulus no ulu Jisas mei. Iakano maal ga noh sisingen taar at ma ga tamapuli timaan taar.

⁸Io, no mes na bulu na harausur nong ga huna hanuat kaia tano midi ga haan laka mah. Ga nes ma ga nurnur.

⁹(Dir pa ga palai baak bia ira nianga tane God di ga pakat i tange bia Jisas na tamat tut at sukun ra minaat.)

¹⁰Io, ira iruo bulu na harausur dir ga tapukus balin taar ta ira ngasia dir tikatikai.

¹¹Iesen Maria ga tur taar at nataman tano midi ma ga susuah. Ing ga susuah ga heraro laka uram tano midi ma ga nes leh airuo angelo. Ira kiniasi dir a ponponiana ma dir ga kis taar tano subaan di ga hainoh tar baak no palatamaine Jisas kaia. Tikai ga kis taar urau ra uno ulalang ma nong tikai ga kis taar uras tano uno kinakadus.

¹³Dir ga tiri Maria bia, “Awai, u susuah warah?” Ma Maria ga balu dir hoken: “Di te kap leh no nugu Watong ma iau pai nunure bia di te bul ie he.”

¹⁴Ing ga tange tar huo ga tahurus gaam nes Jisas ma ga tur taar kaia. Iesen pa ga nes kilam ie bia Jisas mon.

¹⁵Ma Jisas ga tange, “Awai, u susuah warah? Sige iakanong u sisilih utana?” Maria ga lik bia aie no ut na harbalaurai ta iakano matana daha, kaik gaam tange tana bia, “Maris, bia u te kap leh ie, hinawase iau bia u te bul ie iahe, iau nigi a kap leh ie.”

¹⁶Jisas ga tange tana, “Maria.” Maria ga talinganei ma gaam tange tana hoken: “Rabonai!” (a kukuraina bia ‘tena harausur’ tano nianga gar na Iudeia.)

¹⁷Io, Jisas ga tange bia, “Waak bia u palpalim iau kanong iau pai tapukus baak uram ho Mama. Iesen haan uras ta ira tasigu ma nu hinawase diet bia iau hanahaan um uram tano ragu Sus ma nora diet Sus mah, uram tano nugu God ma no udiet God mah.”

¹⁸Io, Maria nong me Magadalen ga haan tupas ira bulu na harausur ma kanin ra hinhinawas: “Iau te nes no Watong!” Ma ga hinawase diet bia Jisas gate tange tar kaiken ra linge tana.