युहुन्‍ना 20:5-18

⁵खे़न् अःक्‍खुम् फन्‍छिङ्‌ङाङ् सिगाङ् ओमे़त्तुल्‍ले़ चेदेःत्तिन्‌खे़प्‍मो ने़स्‍से़बा निःसु, कर सिगाङ्‌ग मे़लाःसे़न्‍लो॥

⁶कुएःक् कुएःक् सिमोन पत्रुसे़न् खे़प्‍मो के़रे़आङ् सिगाङ् लाःसे़॥ खे़ल्‍ले़ चेदेःत्तिन्‌नु

⁷ये़सुरे़ कुनारा मे़दे़प्‍तुबा तेःत्तिन् खे़प्‍मो ने़स्‍से़बा निःसु॥ खे़न् नादे़प्‍मा तेःत्तिन् चेदेःत्तिल्‍ले़ कुबेसाङ् मे़भाक्‍तुआङ्‌ने़स्‍से़बा निःसुरो॥

⁸हे़क्‍क्‍याङ् तगि इप्‍पुङ्‌ङो के़गे़प्‍पा हुॽसाम्‍बे़न्‍नाङ् सिगाङ् लाःसे़॥ खे़ल्‍ले़ खे़न् निःसुआङ् नसाःन् चोगुरो॥

⁹(खे़ङ्‌हाॽरे़ आल्‍लसाङ् ये़सुःन् सिःमे़न्‍लाम् हिङ्‌लॽरिक् साम्‌योसाप्‍लाओ के़बप्‍पे़न्‌कुसिङ् मे़न्‍निःत्ते मे़वये़रो॥)

¹⁰हे़क्‍क्‍याङ् खे़न् हुॽसाम्‍बाहाॽ ने़प्‍माङ् हिम्‍मो नुःक्‍खे़त्‍छिरो॥

¹¹कर मरियम्‍मिन् इःप्‍पुङ् लाःक्‍कात् हाबे़र ये़बे़रो॥ खे़न् हाबे़र अःक्‍खुम् फन्‍छिङ्‌ङाङ् इःप्‍पुङ् सिगाङ् ओमे़त्तुल्‍ले़,

¹²फःगे़लॽबा तेःत् के़जाङ्‌बा ने़प्‍फु माङ्‌लाइङ्‌बाहाॽ ये़सुरे़ कुधक् मे़ने़स्‍सुआङ् ने़स्‍से़बा ते़न्‍नो थिक्‍किन् कुधे़गेःक् ले़प्‍माङ् नु वे़स्‍मान्‌कुलाङ् ले़प्‍माङ् युङे़त्‍छिबा निःसुसिरो॥

¹³खे़न् माङ्‌लाइङ्‌बाहाॽरे़ खुने़ॽ सेःन्‍दोःसे़त्‍छु, “खे़ने़ॽ थेआङ् के़हाःप्‍पाबे?” खे़ल्‍ले़ खे़ङ्‌हाॽ मे़त्तुसि, “इङ्‌गाॽ आदाङ्‌बाल्‍ले़ कुधक्‍किन् कप्‍मोलाम् खे़ङ्‌हाॽरे़ मे़देॽरुरो हे़क्‍क्‍याङ् आत्तान् मे़ने़स्‍सुआङ् ने़इ इङ्‌गाॽ मे़निआन्‍लो॥”

¹⁴हे़क्‍के पाःत्तुर मरियम्‍मिन् खिरि हिसिङ्‌ङिल्‍ले़ ये़सुःन् खे़प्‍मो ये़बे़बा निःसु, कर खुने़ॽ ये़सुःन्‍नेरो फाॽआङ् कुसिङ् निःप्‍मा मे़सुक्‍तुन्‍लो॥

¹⁵ये़सुरे़ खे़न् मे़त्तु, “मामुए, खे़ने़ॽ थेआङ् के़हाःप्‍पाबे? हाःत् के़गोःत्तुबाबे?” मरियमरे़ खुने़ॽग फुङ्‌इक् के़गोःबाबिला लॽरिक् निङ्‌वाॽ इःत्तुआङ् मे़त्तु, “आदाङ्‌बे, दाङ्‌बाल्‍ले़ कुधक्‍किन् कप्‍मोलाम् के़देॽरुआङ् वाॽने़ फाॽग्र आत्तान् के़ने़स्‍सुआङ् ने़ःॽ इङ्‌गाॽ मे़त्ताङ्‌ङे़ॽना, हे़क्‍क्‍याङ् कुधक्‍किन् इङ्‌गाॽ तेॽरुङ्‌लो॥”

¹⁶ये़सुरे़ खे़न् मे़त्तु, “मरियम्‍मे!” खुने़ॽ ये़सुःन्‌ले़प्‍माङ् हिसिङ्‌ङाङ् “रब्‍बोनि!” मे़त्तुरो॥ (खे़न् फाॽइङ्‌ग हिब्रु पाःन्‍नो “सिक्‍साम्‍बे” पोःङ्‌लो॥)

¹⁷ये़सुरे़ खे़न् मे़त्तु “इङ्‌गाॽ मे़दे़म्‍साङ्‌ङिन्‍ने़ॽओ, थेआङ्‌भे़ल्‍ले़ आल्‍लो थारिक् इङ्‌गाॽ पानुदिङ् पाःल्‍लो मे़म्‍बेःक्‍के वाॽआरो॥ कर पेगे़ॽआङ् आन्‍साॽसि अक्‍खे मे़त्ते़से़ॽओ, ‘इङ्‌गाॽ पानुदिङ् आम्‍बा नु खिनिॽ पानुदिङ् पाः हे़क्‍क्‍याङ् इङ्‌गाॽ आनिङ्‌वाॽफुमाङ् नु खिनिॽ निङ्‌वाॽफुमाङ्‌ङो नुःङ्‌ङा पेःक्‍कार पत्तारो॥’”

¹⁸मरियम मग्‍दलिनिःन् पेआङ् हुॽसाम्‍बाहाॽ, “इङ्‌गाॽ दाङ्‌बान् निःसुङ्‌ङाङ् वाॽरो” मे़त्तुसिआङ् ये़सुरे़ पाःत्तुबा पाःन्‍हाॽ खे़ङ्‌हाॽ चे़क्‍तुसिरो॥