Dioni 20:5-18

⁵Dawako ane farike eu afua umanike oma erabo ubarenaro eribaie i Yesunu ofero oba uisa ena inanakeo wau mane aine ibiro erike ubarenaro isare daui.

⁶Ubarenaro isare dauike udiro enare ibiro Fidama danu umuro faraadae i oma erabo ubarenaro isari. Isarike i aine ibi ena inanakeo wau erike nono Yesunu bokairo oba uisa wau worome me i moi wau duboro ibe me, i wau mane Yesunu bokairo oba uisa enaenari aine ibiro eri.

⁸Ereibiro moi dawako fari ena iwoka ukeka mima ubarenaro isarike eraada eno we imui, Yesu fearekaroma uyarinua eno we imui.

⁹(Adinaroe Godinu bukaro Yesu feafekuke nono uyafekua wei wake imuke dauisike Yesu iro me ekikema i wakeye ba eno we imuisi.)

¹⁰I iwoka ukeka miyaima nono owekike emenu goiro anisi.

¹¹I Yesunu iwoka ukeka miyai emua anisiro Merima i oma eraboro nono owere ane fari. Owere ane farike i oma erabo aisame udinakuro farike enare ibaada ii weibi. Ii weebe ubiri afua umanike i ooru ubarenaro eu eribaie inanakeo wau ruki miyai moi mi dawae Yesu oisa bokai enaro yaure ibiro nono moi mi dawae Danu umu enaro yaure ibiro erie.

¹³Eriero i aneruyaima eno weisi, yewa aweka, anemebake ii weaku eno weisi? Eno weisiro Meri Megiderinima ma owerike eno wei, Nanu Dai Waria Mi yewadoma munisake aboro waure ane oisa ari? Na iwoka me ibake ii weakunea eno wei.

¹⁴Eno weike owerike eribaie Yesu idua enare ibiro erike dawama Yesu ma nuna ui.

¹⁵Ma nuna uiro Yesuma anemebake ii weada ainadei yodia uke enaku wei? Eno weiro Merima Dawabake waiya yawokaku miya eno we imuike ibake wei, ama Dawa yewadoma waurinuke moiro ane odinuie i orofa we siboaro animake Danu ofe mumake waure anima eno wei.

¹⁶Eno weiro Yesuma nono wei, Meri, eno weibaie Merima owerike yewae Yesua we imuike i Du orounu wakeroma eno wei, Rabonai wei. (I wakenu ubiye Sisa mi.)

¹⁷Yesuma Meribake eno wei, Nanu Babaebairo amuke ane meya Na da ure burinake owere aniake Nanu iwoka ukeka oroubairo eno wea wei, Nae i Babae Godibairo amuke anakune. Naini yaini iyanu Babae Godi, Naini yaini iyanu Godibairo amuke anakunea aniake eno ane wea wei.

¹⁸Yesuma eno wei ibake Meri nono owerike ani. I Yesunu iwoka ukeka oroubairo ane farike eno wei, iyanu Dai Waria Mi enea eno weike Yesunu wei wake yaisina emuabairo enaenari yarie.