Yon 5:3-15

³Bunsiyas bunatum takatouns immasis, ikayamats beibwab yevagam. Takatouns tasiyas ikaw mites mwasanin, takagayals mwasanin, tasiyas ipams, takatounsa babaws-wan.

⁴(-)

⁵Kuda̱taw teitan immasis, ankatoun nises bweilim sinwatoun kweinim kweitoun.

⁶Yeisuw ikin taw towen, ikakin nagwa̱diven ankatoun nises, ilana, “Tab sivinam bukubwein?”

⁷Takatoun ilana, “O guyaw, ta-ma̱wan ba̱bwein. Igaw yevagam beibwab ta-kweitan gamag bilabeig va̱gan ba̱nuw waseg. Igaw bayokon banoun ban wayevagam, teitan gog bo imug in inuw.”

⁸Yeisuw ilana, “Kutamanaw, kukow musag, kunoun.”

⁹Nuwanaw taw towen mo ibwein, ikow nasag, inoun. Yam towen Sa̱dad, min-Yudiy siSa̱bat, tapwa̱loul peinan.

¹⁰Min-Yudiy ikines taw towen ikokew inasag, idibakes; ilansa, “Nagein Sa̱bat. Nag kadilok bukukow musag.”

¹¹Ikatimop asilivan, ilana, “Teitan gamag niva̱geig mo a̱bwein mtowen bo idibakeig, ilana, ‘Kukow musag, kunoun.’”

¹²Ikatiga̱nes, ilansa, “Kavel taw towen nidibakeim ‘Kukow musag’?”

¹³Togo nag bikakin, peinan Yeisuw bo inoun; gamag singay babaw ven towen.

¹⁴Wankuyeim Yeisuw mo iban taw towen Yowbad wanbunatum, idibek, ilana, “Ya̱koum bo kubwein amkwatoun waseg. Awoum amsinap kalbaleb kuvag vayuwein; mata kalbaleb singay avakaein mo bukulouvat geg.”

¹⁵Taw towen mo inoun inekes min-Yudiy tasiyas, ilana, “Mtowen Yeisuw iva̱geig mo a̱bwein.”