San Juan 5:3-15

³Bajarapabobërëtonëjavata piavitanevi ayaibitsaëtoxaneto bobena. Itsamonae bitso pitaxutotsëcënaevi. Itsamonae pejayujayunaevi. Itsamonae peperabëcuenabivitsi. Daxita bajarapamonae evetanubena pucayo pemenenacujirubijava.

⁴Athëbëvetsica ángel jemata runabiabica pucayojavabetsica. Nexata pucayo menenacujirubabiaba. Pemenenacujirubijavata, pajivi copiaya runareca pucayojavabereca, bajarapajivi pavitanecuene capunatsi, vecuaajibiaexanabiabatsi.

⁵Bajarajota naboca treinta y ocho pavaibeje piavitanetsanucaenë, petabusipacuenabinëtsi.

⁶Itsa Jesús taeyabuata bajaraponë, nexata yapëtaeyabuata bajayajebi piavitanenëcuene. Nexata Jesús jumaitsi bajaraponëjavabelia: —¿Jitsipame tsaja nejamatejemajava? jai Jesús.

⁷Nexata bajaraponë jumaitsi: —Itsajivi ata apo xainaenë tanecopatsinexareca pucayojavabereca itsa mene nacujiruba. Ajena narunabiabijitsianëreca, bajarapaepatota itsajivi netsurunabiabareca copiaya, jai piavitanetsanucaenë.

⁸Jesús nexata jumaitsi piavitanetsanucaenëjavabelia: —Namatacore. Pire nijapanayo. Ponare baja, jai Jesús.

⁹Bajarapacuenia Jesús pejumaitsijavata, jamatejema baja piavitanetsanucaenëmi. Pita baja pijapanayo. Ponaexanepana baja. Bajarapacuenia petabusipacuenabinëtsi Jesús jamatejemayaexana judíovi penacueraevetsimatacabita.

¹⁰Nexata judíovi jamatabëcuenenavëxaniabiaya jumaitsi petabusipacuenabinëmitsijavabelia: —Ajena raja vajanacueraevetsimatacabi. Nexata apo xanepanae necaponaponaenexa nijapanayo, jai judíovi, tsipaji bajarapamonae apo jitsipae itsajivi ata pexanaenexa itsacuenejavayo ata penacueraevetsimatacabita.

¹¹Nexata petabusipacuenebinëmitsi jumaitsi judíovijavabelia: —Tanejamatejemayaexanaenë raja nejumaitsi: “Nijapanayo pire. Ponare baja,” nejai, jai petabusipacuenabinëmitsi judíovijavabelia.

¹²Nexata icatsia judíovi jumaitsi: —¿Jipatsa nexata cajumaitsi: “Nijapanayo pire. Ponare baja,” cajai? jai.

¹³Itsiata baitsi jane bajaraponë apo vënëyapëtae pavënënë jamatejemayaexanatsi. Apo vënëyapëtae Jesús. Tsipaji bitso jivi ayaibitsaëtoxaneto bajarajota jinavanapa. Jesús baja cajena pepuaponae itsajavabelia, yanijobatsi.

¹⁴Bajaraxuacujinae icatsia Jesús caxitajarabaxuaba bajaraponë templobota. Nexata Jesús jumaitsi bajaraponëjavabelia: —Taema. Aeconoxae baja jamatejemamë. Icatsia pëtsa baja matavëjëa exaname pibisiacuene. Icatsia raja itsa exaname, bitsomë tsipae, jai Jesús bajaraponëjavabelia.

¹⁵Nexata bajaraponë pona baja. Tsipaeba judíovijavabelia. —Jesús tsaena raja nejamatejemayaexana, jai judíovijavabelia.