Yohanis 16:6-26

⁶Huu Au afada dedeꞌa kala ia neu ei so, huu ndia de ei dalem hedis so.

⁷Tehuu hata fo Au afada ei ndia, tetebes. Mete ma Au uu, na, ndia malolen seli neu ei. Huu mete ma Au taa uu, na, Mana Makalalaꞌok ndia taa mai natudu dalak neu ei. Tehuu mete ma Au uu, na, Au haitua Ndia mai soaneu ei.

⁸Dei fo mete ma Ana mai so, na, Ana natudu hataholi malai daebafok ia nae, sila dale nala ma sila tatao nala sila, sala. Ana kokoe sala fo tungga dala ndoon. Ma Ndia boe oo nasaneneda kasa nae, neu ko Lamatuak nau naketu sila dedeꞌa nala nae, sila ndia, ndoos do sala.

⁹Mana Makalalaꞌok ndia natudu sila sala nala, huu ala taa lamahele leu Au.

¹⁰Ndia boe oo natudu dala soda ndoos. Huu Au fali uni Au Amang uu, dei fo ei taa mita Au so bali. Huu ndia de Mana Makalalaꞌok ndia mai nggati Au.

¹¹Ndia boe oo natudu nae, Lamatuak nau naketu hataholi la dedeꞌa nala no ndoos, huu Lamatuak naketu nitu la malanggan dedeꞌan so, fo mana palenda nai daebafok ia.

¹²Hambu dedeꞌak noꞌuk fo Au sangga afada ei, tehuu ei bei ta bisa bubuluk hatematak ia.

¹³Tehuu dei fo mete ma Dulak mai natudu dedeꞌa ndoo sala, mai so, na, Ana nakalaꞌok fo ela ei bisa bubuluk basa dedeꞌa ndoo sala. Ana taa kokolak tungga Ndia hihii hehelin, tehuu Ana nafada hata fo Ana namanenen neme Au Amang mai. Ndia boe oo sangga nafada ei, hata fo doo-doo dei fo ana dadi.

¹⁴Ana nau soꞌu namadedema Au, huu Ana nau buka basa hata fo ndoos laꞌeneu Au, ma natudu neu ei.

¹⁵Basa hata fo dadik neu Au Amang enan, dadik neu Au enang boe. Huu ndia de Au kokolang isinaak ndia ae, dei fo Lamatuak Dulan sangga buka basa hata fo ndoos, laꞌeneu Au, ma natudu neu ei.”

¹⁶Yesus nafada nakadaik nae, “Taa dook so bali, na, ei taa mita Au so. Tehuu taa dook boe, te ei mita falik Au.”

¹⁷Basa ndia, boe ma Ndia ana mana tungga nala luma lakokola lae, “Lamatuak hihiin hata, de nae, ‘Taa dook so bali na, ei taa mita Au. Tehuu taa dook boe, na, ei mita seluk Au bali.’ Ma hatina de Ana kokolak nae, ‘Huu Au sangga uni Au Amang uu?”

¹⁸Boe ma ala latanen lae, “Ndia hihiin hata de nae, ‘Taa dook bali’? Ai taa bubuluk.”

¹⁹Yesus bubuluk so, ala sangga latane Ndia dedeꞌak esa. Boe ma Ana kokolak nae, “Isinaak Au kokolak ae, ‘Taa dook so bali, te, ei taa mita Au. Ma taa dook so bali te, ei mita falik Au.’ Ei matatanen leondiak hetu?

²⁰Malole boe, mete ma ei nau sangga bubuluk leondiak. Au boe oo sangga afada ei leoiak: dei fo ei mamatani ma dale hedi, tehuu hataholi feꞌek lai daebafok ia lamahoko. Mae ei dale hedi leondiak, tehuu dei fo ei mamahoko seluk.

²¹Ndia sama leo inak esa nameda tein hedis fo ana sangga bonggi. Dalen belak dei, huu dale hedik mai so. Tehuu basa boe ma ana bonggi nala anan ndia, de ndia dale hedin mopo heni mema kana. Tehuu, ndia dalen namahoko, huu hambu hataholi beuk nana bonggik neni daebafok ia mai.

²²Leondiak boe no ei. Hatematak ia ei mamatani, ma dale hedi. Tehuu doo-doo, te Au mai tilo seluk ei, de ei dale mala lamahoko seluk. Ma mete ma ndia dadi so, na, taa hambu hataholi esa boe bisa nakalelee ei namahoko mala.

²³De mete ma dedeꞌak ndia dadi so, na, ei taa matane Au hata-hata so bali. Tetebes! Au afada seluk ei bali ae, mete ma ei moke Au Amang sudi hata, minik Au nadeng, na, dei fo Ana tao leondiak soaneu ei.

²⁴Losa hatematak ia, ei bei taa moke sudi hata, minik Au nadeng. De moke leo, fo ei simbon. No leondiak, ei dale mala bisa lamahoko tetebes.”

²⁵Yesus kokolak nakadaik nae, “Losa hatematak ia, Au ateme anoli ei unik nakandandaa kala. Tehuu dei fo hambu faik fo Au anoli taa pake nakandandaak bali. Huu Au nau kokolak manggaledok laꞌeneu Au Amang.

²⁶Mete ma fain ndia mai so, na, ei mesa nggei hule-haladoi fo moke makandoon neu Au Amang, minik Au nadeng. Boso Au hule-haladoi fee ei bali.