Jon 16:6-26

⁶Keu mewö jizali, eŋön mi möta miaŋgöra wösöbiriknöŋ uruŋini kokolak qei malje.

⁷“Mewö maljemö, töndup nöŋön miaŋgö likepŋi keu ölŋi kun kewö jibi mötket: Nöŋön eŋgömosöta liliŋgöba öŋgömami, miaŋgö ölŋan asuhuiga mönö kewö mem ölöwak eŋgima: Nöŋön öŋgöba köiput Toŋi melaibiga eŋgöreŋ eta uruŋine gema. Nöŋön qahö eŋgömosöta öŋgöbileŋak ewö, Toŋi yaŋön mönö eŋgöreŋ etmamgö osima.

⁸“Köiput Toŋi yaŋön eta malmalgö könaŋi kewö kondel eŋgiba malma: Gölme dop siŋgisöndokŋini indela kondeli Anutunöŋ keuŋini jim teköiga solanime me uruŋini qahö meleŋgetka keuŋini jim teköba likepŋi meleŋ eŋgima. Ambazipnöŋ könaŋamŋini mewö eka möt kutume.

⁹Ni qahö möt narim niŋgizeaŋgöra siŋgisöndokö könaŋi indel eŋgiiga möt kutume.

¹⁰“Anutugö köna solanŋi möt sohoba nöŋgöra keu laŋ jimakze. Miaŋgöra yaŋön nöŋgö könaŋamni indela kondel eŋgiiga kewö möt kutum niŋgime: Nöŋön solanŋi mala Iwinaŋgöreŋ liliŋgöba öŋgöbiga ni kunbuk qahö neka malme.

¹¹Bölöŋaŋgö Kembuŋi gölme dop galöm köl eŋgimakzapmö, Anutunöŋ yaŋgö keuŋi lök jim teköyöha könöp siagö Toŋi akŋa. Miaŋgö dop körek neŋgö keunini mewöyök jim teköma.

¹²“Nöŋön ölöp keu gwötpuk toroqeba jibileŋakmö, mi nalö kewöŋe jibiga usuŋumburaŋ aka köl gulibingö osibepuk.

¹³Mi osibepukmö, keu ölŋaŋgö Toŋi, Uŋa Töröŋi yaŋön eta uruŋine geba keu saŋep qei mötme. Mi nanŋi imbiŋaŋgö dop laŋ qahö jiba malmapmö, Anutugöreŋ keu kezap ala mötzawi, yaŋön mönö miyök jimakŋa aka könaŋgep yuai asuhumawi, mi qeljiŋe indela jima. Miaŋgöra yaŋön eŋgömemba keu ölŋi pakpak miaŋgö o aŋgöŋe al eŋgiiga keu ölŋaŋgö köna tiba anme.

¹⁴“Yaŋön mönö nane köwenöhök keu memba jim asariba uru kuŋgum eŋgiba malma. Miaŋgöra mönö nöŋgö könani indeliga nöŋön qetbuŋanambuk ahakŋam.

¹⁵Iwinaŋgöreŋ yuai pakpak ahözawi, mi mönö nöŋgö böröne ali ahöza. Miaŋgöra jizal, ‘Yaŋön mönö nane köwenöhök keu memba jim asariba uru kuŋgum ak eŋgiba malma.’ Keu mi mewö.”

¹⁶“Nalö töröpŋi kun teköiga iŋini ni kunbuk qahö nekŋe. Miaŋgö andöŋe nalö töröpŋi kun teköigun mönö asuhum eŋgibi ölöp kunbuk nekŋe.”

¹⁷Mewö jiiga gwarekurupŋi yeŋgöreŋök tosatŋan nanŋinök kewö eraum mötket, “Keu kewö jiza, ‘Nalö töröpŋi kun teköiga iŋini ni qahö nekŋe. Miaŋgö andöŋe nalö töröpŋi kun teköigun mönö asuhum eŋgibi ölöp kunbuk nekŋe,’ aka keu kun kewö jiza, ‘Ni Iwinaŋgöreŋ öŋgömam.’ Mewö jiiga mötzini, keu yahöt miaŋgö könaŋi mi denöwö?”

¹⁸Mewö eraum möta uzohola jiget, “Yaŋön ‘Nalö töröpŋi teköigun,’ jizapmö, keu miaŋgö könaŋi denöwö? Mi wuanöŋgöra jizawi, nini mi qahö möt asarizin.”

¹⁹Mewö jiba qesim waŋgibingö mötketka Jisösnöŋ eŋgek kutuba kewö jii mötket, “Keu kewö jizal, ‘Nalö töröpŋi kun teköiga iŋini ni qahö nekŋe. Miaŋgö andöŋe nalö töröpŋi kun teköigun mönö asuhum eŋgibi ölöp kunbuk nekŋe,’ Iŋini mönö keu miaŋgö könaŋi jaruba eraum mötze me?

²⁰“Nöŋön keu öl töhönŋi kun kewö jibi mötket: Nöŋön anbiga iŋini jiŋgeŋ köla sahötmemö, uruŋini qahö meleŋget yeŋön laŋ börum memba sösöŋgai aka malme. Iŋini wösöbirik aka malmemö, wösöbirikŋini miaŋön mönö nöŋgöra aka meleŋda sösöŋgai aka malme.

²¹Ambinöŋ morö memamgö nalöŋi kam kuŋguiga masö qeiga qemjeŋ qakŋe morö mezapmö, morö dölökŋi memba kinda i eka sösöŋgaiŋaŋgöra mönö sihimbölöŋi mi ölum qemakza.

²²Miaŋgö dop iŋini mewöyök nalö kewöŋe wösöbirikpuk maljemö, nöŋön könaŋgep kunbuk asuhuba eŋgekiga iŋini ölöp urusösöŋgaibuk malme. Urusösöŋgaiŋini mi kunŋan kun qahö eŋguaŋgitma.

²³“Nalö miaŋgöreŋ yuai kungöra ni qahö qesim niŋgimemö, köulukŋini Iwigöreŋ algetka diŋdiŋanök ani amqei malme. Nöŋön keu öl töhönŋi kun kewö jibi mötket: Iŋini nöŋgö qetnöŋ yuai kungöra Iwi köuluköm waŋgime ewö, yaŋön mi mönö tököm eŋgima.

²⁴Nömbuk mala kageri, iŋini nalö miaŋgöreŋ yuai kungöra nöŋgö qetne qahö köuluköba malget. Mönö Iwi köuluköba malme. Köulukögetka ölöp meleŋ eŋgima. Mi eŋgiiga sösöŋgaiŋinan asuhum sehiba uruŋini kokolak qem teköi malme.” Mewö.

²⁵“Keu jibi möta kamakzei, mi keu saiŋambuk jibi möta malget. Könaŋgep nalö kun kam kuŋgumawi, miaŋgöreŋ keu saiŋi mi kunbuk qahö qeba jibi mötme. Qahöpmö, Iwinaŋgö könaŋi mi aukŋe jim asariba malmam.

²⁶Nalö miaŋgöreŋ iŋini nöŋgö qetni qeta Iwi köuluköba malme. Miaŋgö könaŋi kewö: Iŋini köulukŋini Iwigöreŋ albingöra nöŋgöreŋ kunbuk qahö kamakŋemö, nanŋinak Iwigöreŋ diŋdiŋi köuluköba malme. Nöŋön eŋgö jit memba Iwigö qahö köulukömam.