Joaŋ 16:6-26

⁶Aê kasôm biŋ tonaŋ gêdêŋ amac e amacnêm ŋalêlôm ŋawapac gêjam aucgeŋ,

⁷ma aê jasom biŋŋanô êndêŋ amac gebe jawi amac siŋ nec, oc êmoasiŋ amac. Embe jawi amac siŋ atom, oc ênam-awemwaga êndêŋ amac êmêŋ atom. Embe jana, go jasakiŋ eŋ êndêŋ amac êmêŋ.

⁸Ŋac tonaŋ êmêŋ, go êwaka lau nomŋa nêŋ kauc sa êpi sec tau ma êpi biŋgêdêŋ to êpi Anôtônê mêtôc.

⁹Êpi sec gebe sêkêŋ gêwiŋ aê atom.

¹⁰Ma êpi biŋgêdêŋ gebe jandêŋ Tamoc jana ma amac alic aê êtiam atom.

¹¹Ma êpi mêtôc gebe Anôtô kêmêtôc nom tonec ŋatau su.

¹²“Aêŋoc biŋ ŋagêdô gwalêkiŋ gebe jasôm êndêŋ amacŋa tec gêc, mago galoc oc asip sa atôm atom.

¹³Ma êndêŋ taŋ ŋac ônê, Ŋalau biŋŋanôŋa, tau êmêŋ naŋ, oc êwê amac ajala biŋŋanô tau tomalageŋ, gebe eŋ oc êsôm tau nê biŋ atom. Biŋ taŋ eŋ gêŋô naŋgeŋ, tec êsôm ma eoc biŋ, taŋ oc mêŋêsa naŋ, lasê êndêŋ amac.

¹⁴Ŋac tau oc êwaka aêŋoc ŋawasi sa, gebe eŋ oc êkôc su aŋga aêŋoc ma êsôm lasê êndêŋ amac.

¹⁵Tamocnê gêŋ samob kêtu aêŋoc. Amboac tonaŋ tec kasôm gebe Ŋac tau êkôc su aŋga aêŋoc ma êsôm lasê êndêŋ amac.

¹⁶“Têlageŋ acgom ma alic aê sapu, ma têlageŋ êtiam, go alic aê êtiam.”

¹⁷Ênê ŋacseŋomi ŋagêdô sêsôm gêdêŋ tauŋ gebe “Biŋ tonec amboac ondoc, tec eŋ kêsôm gêdêŋ aêac nec gebe ‘Têlageŋ acgom ma alic aê sapu, ma têlageŋ êtiam, go alic aê êtiam, ma ŋalô tonec ‘Aê jandêŋ Tamoc jana.’”

¹⁸Ma Êsêac sêsôm gebe “Biŋ tonec amboac ondoc, tec eŋ kêsôm nec gebe ‘Têlageŋ.’ Aêac tajala ênê biŋ ŋam atom nec.”

¹⁹Jesu kêjala êsêac sebe têtu kênac eŋ, tec kêsôm gêdêŋ êsêac gebe “Amac apuc taôm gebe kasôm gebe ‘Têlageŋ acgom ma amac alic aê sapu, ma têlageŋ êtiam, go alic aê êtiam me.’

²⁰Biŋŋanô, aê jasôm tobiŋŋanôgeŋ êndêŋ amac gebe Amac oc ataŋ ŋanô e apuc taŋiboa sa ma ataŋ ma lau nomŋa oc têtu samuc. Amac oc amoa tonêm ŋalêlôm ŋawapacgeŋ, mago nêm ŋalêlôm ŋawapac tonaŋ oc ênam tau ôkwi êtu têmtac ŋajam.

²¹Awê teŋ embe êkôc ŋapalê, oc nê ŋalêlôm ŋawapac gebe nê noc kêdabiŋgac. Mago êndêŋ taŋ êkôc ŋapalê su naŋ, taê ênam ŋandaŋ êtiam atom, têtac ŋajam gebe kêkôc ŋapalê kêtu awê sugac.

²²Amboac tonaŋ galoc tonêm ŋalêlôm ŋawapacgeŋ amoa e êndêŋ taŋ jalic amac êtiam naŋ, têmtac ŋajam êsa. Ma lau teŋ oc sêkôc têmtac ŋajam su aŋga amacnêm êtiam atom.

²³Êndêŋ bêc ônê oc atu kênac biŋ teŋ êndêŋ aê êtiam atom. Biŋŋanô, aê jasôm tobiŋŋanôgeŋ êndêŋ amac gebe Embe ateŋ gêŋ teŋ êndêŋ Tamoc anam aê laŋôc, oc êkêŋ êndêŋ amac.

²⁴Mêŋgêdêŋ tonec amac ateŋ gêŋ teŋ ajam aê laŋôc atom. Ateŋ oc akôc ma têmtac ŋajam êsa samucgeŋ.

²⁵“Biŋ tonec ŋai kasôm kêtu biŋgôliŋ gêdêŋ amac. Ma ŋanoc tau mêŋêsa, oc janam êtu biŋgôliŋ êndêŋ amac êtiam atom, jawa Tamoc ŋam sa êndêŋ amac ênêc awêgeŋ.

²⁶Êndêŋ bêc ônaŋ amac oc ateŋ gêŋ anam aê laŋôc, naŋ aê jasôm êndêŋ amac gebe aê oc jateŋ êndêŋ Tamoc êtu amacŋa êtiam nec atom.