YOHAAN 7:2-36

²Dhali ayuḵ gi ’Kwani Yahuuda/ jin yuḵuwa yuḵ mo gom Gu’b C̱iŋa/ mo tani ’dishki’d mo be.

³Wakan ikam piti o a’di gwo mo ki: Dhali mo yan mo dhali yayi e Pa Yahuudiyya mo ki imanciḵ /e gwo mini ’taki p̱ar miim pini e jin miikina /e mo.

⁴Haali/ wathiŋ kamu/ yisa di’da jin miiki’da ṯu’c ka ’di/ mo waḵki/ a’di ona bwa ki miim piti minu mish eya tente/ mo. Waḵki/ /e mii to gwansan mo tani ṯori is pini eya tente/ e ’kwaniny’cesh mo.

⁵Haali/ ikam piti si’dayi ’koki gam a’di gwo is mo be.

⁶Dhala Yesus ki o uni gwo mo ki: Mom pem diki p̱u’d naskina/ mo be, hili mom bum uni ’kokin isa yempa/ mo.

⁷’Kwaniny’cesh ’koki shi/ umi e mo, hili uni shi/ki aha/ i e mo haali/ aha/ ṯorkina uni gwo ki miim buni kun miikina uni mo tani ta thus ki thus mo be.

⁸Iiku/ um mo ma eya yuḵ jin yuḵu ka tul ’kup̱ ki is bum mo. Aha/ mina diki ya eya yuḵ jin yuḵu mo haali/ mom pem diki p̱u’d mo mmothim mo naskina/ mo.

⁹Gom gwo jin ona a’di kan mo tani a’di c̱a’bki’d e Pany Jaliil mo be.

¹⁰Hili ŋ’ko’d ki ikam piti iikin ka gagamis e mo ma yuḵ jin yuḵu mo tani yan’ko’d a’di si’da/ yaki’d ka gagamis mo, yisa ya’d eya tente/ yisa, hili ka ḵwal is mo be.

¹¹Dhali ’Kwani Yahuuda/ ’kokin mo mmoŋap̱ a’di ka cim jin yuḵuwa yuḵ mo dhali o gwo mo ki: Mane a’di sa/?

¹²Dhala dhana gumgum miikin ma waambuhany ’kwani mo gom a’di mo. Kun tiya o gwo mo ki: A’di ta wathi/ jin ’boro’d mo be. Dhali kun tiya o gwo mo ki: Yisa. A’di suski ’kwani mmodheres mo be.

¹³Bahili gom ’Kwani Yahuuda/ mo tani wathin ṯal ’deŋ kamu/ yisa di’da jin oki gwo eya tente/ gom a’di mo be.

¹⁴Dhali ibwaman ma yuḵ jin yuḵu mo tani Yesus yaki’d ka gagamis mo e gu’b gi mondheleladhelel mo dhali ṯor gwo mo be.

¹⁵Dhali ’Kwani Yahuuda/ merkin mo gom gwom piti mo dhali o gwo mo ki: Ki wathi/ yansan mishki gwo ’peni mana kan mo ki a’di diki di mo naskina/ mmomish gwo deŋ e mo?

¹⁶Wakan aYesus ki thoḵ uni gwo mo ki: Gwom pem jin ṯorka/ mo tani diki ta jim pem mo, hili ta ji gi a’di jin hashki aha/ mo be.

¹⁷Waḵki/ wathiŋ kamu/ ona bwa ki mii bwam piti mo tani a’di midi mish mo mo waḵki/ gwo jin ṯoru ta jim ma Arumgimis mo walla waḵki/ aha/ ṯora gwo ki moshirr pem gana/ mo be.

¹⁸A’diyin jin oki gwo ki moshirr pitiŋ gana/ mo tani a’di ŋap̱ki monyca ki is piti mo. Hili a’diyin jin ŋap̱ki monyca gi a’di jin hashki a’di mo tani ta jiŋ gana/ mo dhali mii kun ’koki ta kuŋ ḵar/e yisa ’kona e a’di mo be.

¹⁹Din ma Musa ki c̱i um gwoŋḵan jin c̱inu mowa? Dhali jan ṯal ’deŋ kamu/ ’peni um yisa di’da jin dhuki gwoŋḵan jin c̱inu mo. Ata iŋap̱kina um aha/ mmo’kosh mo?

²⁰Dhali ’kwani ki thoḵ a’di gwo mo ki: /E tan ga ruma ’cesh mo. Aja iŋap̱ki /e mmo’kosh jwa mo?

²¹Yesus ki thoḵ uni gwo mo ki: Aha/ miikina jasi ton ṯal ’de/ mo dhali umi ’baar mo merkin mo gom a’di mo be.

²²AMusayi ic̱iki um gwo mo gom mo jin minu ’ciṯẖa/ munyjal yis mo (dhali a’di yisa jasi ’pena Musa, hili ’peni ibabam bum mo) dhali um ki ’ciṯẖ wathiŋ gwaṯẖa munyjal yis piti ka cim ma pesu/ mo be.

²³Waḵki/ ka cim ma pesu/ wathiŋ gwaṯẖ ki bu’th mo jin ’ciṯẖuwa munyjal yis mo tani wakan gwoŋḵan jin c̱in ma Musa mo tani minu ’koki ’taki ’ce’d mo. A/um mii aha/ ka nyor mmowac̱ka/ buŋgwar is gi wathi/ ka ’bimpil mmo’bor mo ka cim ma pesu/ mowa?

²⁴Dhalku/ gwo ki dwall eya p̱or ma pije/ kan mo, hili dwalli gwo ki dwall gana/ ka ḵar/e mo.

²⁵’Kwanin tiya ’peni Pa Urushaliim oki gwo wakan mo ki: Ki a’di diki ta wathi/ a’dana jin ŋap̱kina uni mmo’kosh mowa?

²⁶Dhali a’di di’di mahan shwane/ mmoṯor gwo eya tente/ mo dhali uni ’koki o gwoŋ kamu/ e a’di mo. A/mina uni gwansan kun ta gi moshirr imish ki a’di yansan ta’da Ḵrisṯẖos ’te/sana?

²⁷Bahili aman mishkina mo jin yayina wathi/ yansan ’peni cine/ mo dhali ka Ḵrisṯẖos minu piyu/ ’kwani i is mo tani wathin ṯal ’deŋ kamu/ yisa di’da jin midi mish mo jin yayina a’di ’peni cine/ mo be.

²⁸Wakan Yesus ki ṯor uni gwo mo eya tente/ mo me’d jin ṯorkina a’di gwo e gu’b gi mondheleladhelel mo mmo/o gwo mo ki: Um mishi aha/ mo dhali mo jin yayika/ ’peni cineyi? Hili aha/ dinaki yayu/ ki bwam pem mo. A’di jin hashki aha/ mo tani ta a’diŋ gana mo, dhali a’di tani ’kona um ki mish mo be.

²⁹Aha/ misha a’di mo haali/ aha/ yayina ’peni a’di mo dhali a’diyi ihashki aha/ mo be.

³⁰Wakan uni ŋap̱ki bway mo mmobu’th a’di mo, hili wathin ṯal ’deŋ kamu/ diki kar me’d piti ap̱o/ a’di mo haali/ mom piti diki p̱u’d naskina/ mo be.

³¹Dhali hili ’kwani ka ris gamki a’di gwo is mo dhali uni o gwo mo ki: A/ki me’d jin minu piya Ḵrisṯẖos ’kwani i is mo tani a/mina a’di mii miimer ki nyanye/ mmobol ku gi miina wathi/ yansan e mowa?

³²Dhali ’Kwani P̱arisiyiin ciḵkina waambuhany ’kwani mmomiikina uni agumgum kan mo gom a’di mo, dhali igasiis kun can mo dhali ’Kwani P̱arisiyiin hashka iboliish mo mmobu’th a’di mo be.

³³Dhali yan’ko’d Yesus ki o uni gwo mo ki: Aha/ mina di e um ari’ceenne/ mo dhali yan’ko’d aha/ mina ya e a’di jin hashki aha/ mo be.

³⁴Um mini ŋap̱ aha/ mo dhali um mini ’koki gam aha/ mo haali/ mo jin miga/ ya mo tani mina um moli iiyu/ mo be.

³⁵Dhali ’Kwani Yahuuda/ oki gwo ka rem ’kup̱ mo ki: Ki mana dina wathi/ yansan gwo ibwa mo mmoya mo jin mina ana ’koki gam a’di mo? A’di dina gwo ibwa mo mmoya mo e bwaman ’Kwani Yahuuda/ kun c̱ekerkunu bwa mo e bwaŋ ’Kwaniŋ Griḵi mo dhali ṯor ’Kwaniŋ Griḵi gwo mo ’taa?

³⁶Ki ’pemen gwo yan jin ona a’di ta’da taye? jin ona a’di ki: Um mini ŋap̱ aha/ mo tani dhali um mini ’koki gam aha/ mo, dhali, Mo jin dika/ nycine/ mo tani mina um mol iiyu/ icine/ mo be.