Yoane 9:6-21

⁶Inguc milu himongka sofockelu himong yogo balu lalickeme nolac fikeme, ngic donge-pisic yele dongewa hosowec.

⁷Hosolu yanguc edowec, “Ga Siloam misa lifucka hikelu dongegone suwenong.” (Siloamte fungine yogo “Salebong hikewec.”) Inguc mime hikelu dongeine suwelu hilalu hefaliye kwesiwec.

⁸Inguc ailu hefaliye kwesime, macfocine nga ngic-ngigac gocne esecne woc-wiyacte milocebalu game nganiibong, yengi yanguc miibong, “Ngic yagodi ngiyelu woc-wiyacte milocnubalu gawec, me?”

⁹Inguc mibong gocne yengi miibong, “Yogo ye hocne.” Aime gocne yengibac miibong, “Yogo ye miyac, yogo ye ingucne ngic monicti.” Aime yeuctihac yowa milu edocebalu gawec, “Ngic yago na hocne.”

¹⁰Inguc mime uwacnoibong, “Ga wenuc ailu dongegone hilagic?”

¹¹Inguc mibong yedi yanguc miwec, “Ngic monic wacine Yesu, yedi nolac lalickelu dongena hosolu salecnulu migac, ‘Ga hikelu Siloam lifucka dongegone suwenong.’ Inguc mime na hikelu lifucka dongene suwelu hilagabac.”

¹²Inguc mime yanguc uwacnoibong, “Aime ngic yogo weni?” Inguc mibong yedi miwec, “Na mi ngagegabac.”

¹³Inguc mime yenge ngic esecne donge-pisic gawec, yogo Farisaio yengela mengockelu hikeibong.

¹⁴Aime Yesu ye nolac lalickelu ngic dongeina hosolu bame dongeine hilawec, yogo Sabat damengka inguc aicnowec.

¹⁵Aime Farisaio yengi inguchac ngic yogo nganilu uwacnoibong, “Ga wenuc ailu dongegone hilagamec?” Mibong miwec, “Ye nolacti dongena hosome dongene suwelu hilagabac.”

¹⁶Inguc mime Farisaio gocne yengi yanguc miibong, “Ngic yogo ye Sabat ngiyecaigabeleng, yogolec yefe mi balaibegac. Ilec ye Wapongtacni miyac.” Inguc mibong gocnedi miibong, “Ngic bikickolecti wenucka pasile maaine ingucne badaicte?” Inguc milu yengungtihac siyeckeibong.

¹⁷Siyeckelu donge-pisicti dongeine hilawec, ye hatacmac uwacnoibong, “Ga ngic dongegone bame hilagamec, yele wenuc migic?” Inguc mibong yedi miwec, “Ye siduc-mimi ngic monic.”

¹⁸Inguc mime Yuda ngic yengi ngic yogo donge-pisic gaweckacni dongeine madickeme hilawec, yogo mi ngagesingkeibong. Mi ngagesingkelu nenggac-mamackecine wacepalu

¹⁹yanguc uwayeteibong, “Ngic yago ye ngekele madec, me? Ye dongeine pisickeicne fikewec, inguc migabiyec, me? Aime ye wenucka yakumac dongeine hilagac?”

²⁰Inguc mibong nenggac-mamackecine yeki yanguc miiboc, “Ngic yago nokele madec. Ye dongeine pisickeicne fikewec, yogo ngagegabelec.

²¹Aime wenucka yakumac dongeine hilagac, ailu madi dongeine bamadickegac, yogo noke mi ngagegabelec. Ye biyac suguleicne. Ilec yeicne uwacnobong, yeuctihac fungineine edocngebana.”