Juan 9:6-21

⁶Jascajaxon mai qui toshbanhahxon huaho berojaxon benche betsamxon yohiquin:

⁷—Siloé janeya noaho benashitanhue —hahquin. Siloé ta raanah hihcatsihquiqui. Jascahah, cahax, benashitani joquin jisbenascaquin.

⁸Jan coriqui yocacahtai jispahonibaan sca yocaquin: —¿Neama hin, yoca yocaqui tsahopahoni joni? Jahuen hahbe jihuenihbaan rihbi jascajaquin yocaquin.

⁹—Jaabi ta qui —hihqui caibo. —Jaamahax bi ra ta jaa quescapih qui —hihqui caibo rihbi. —Hea tah hen qui —hihqui jaabi sca.

¹⁰Honancatsihquin sca: —¿Miabi hihquish jenquetsahax min bero siriscaiquin? —hahcanquin.

¹¹—Jesus janeya jonin huaho berojaxon heen bero qui betsamxon hea Siloé janin nashitanhue hahcah tah hen nashihi sca cahaqui jisresscanoxon —hihqui.

¹²—¿Jahuen hin, jaa joni? —hahcanquin. —Hen ta hen honanyamahi —hahquin.

¹³Benche hihpahoni joni fariseobo janin sca bocanquin.

¹⁴Tantiti neten cahen Jesusen huaho berojaxon jahuen bero rohajanish.

¹⁵Fariseobaan sca yocarihbiquin: —¿Jenquetsahaxon miin bero rohajaxquin? —hahcanquin. —Jaan heen bero qui huaho tsamanah benashixon tah hen jisresscai —jato jaquin.

¹⁶—Papa Diosen raanahma tah qui. Tantiti neten jan tantibahinayamahi copi tah non honanai —hihcani caibo fariseobo sca. —¿Jenquetsahaxon hohchayahpa jonin jascapa hahan honanti jatihquin? —hihcani caibo rihbi. Caibo huetsa shinanya hihnon caibaan rihbi huetsa shinanquin.

¹⁷Benche hahquirihbi yocacanquin: —Mia ta bero rahonaxqui. ¿Mian jisi jenquetsahpa joni quin? —hahcanquin. —Papan joi yohinica tah qui —hahquin.

¹⁸Jan benche hihpahonixon bi rahma pari jisi judiobaan nincacatsihyamahi. Hihcoinai shinanyamacanquin. Jahuen papa, jahuen mama yocarihyamaxon hihcoini jaa yohuanai shinanyamacanquin.

¹⁹—¿Nea hin, maton baque, benche ta cainnishqui hih man jain? ¿Jenquetsahaxon sca rahma jisiquin? —hahcanquin.

²⁰Jascahah: —Jaa ta noquen baque qui, non tah non honanai. Jan benche cainni tah non honanrihbihi.

²¹Jenquetsahaxon jan rahma jisiquin, non tah non honanyamahi. Tsoan jahuen bero rohajaxquin, non tah non honanyamarihbihi. Jaabi yocanahue. Hani sca ta jaiqui, jaanbi ta mato yohitihiqui.