San Juan 9:6-21

⁶Xi cavatju cachja Jesús cjua vëhë ne, sehe cacandi me natya rë me nangui, hane casahmi me hitsë ndasi, sehe catsufë me tuxcun cha rcá jan.

⁷Sehe cachja me cojo cha cuitjin: ―‍Tángun tinchacjun ngajan nda Siloé. ―‍Cuatjin cachja Jesús. (Siloé ne, meje cuichja Caningatjun rë.) Hya xi camá ne, quiji cha cavinchacjan cha. Xi tu cavuya cafe cha ndava cha ne, ha tsejen rë cha.

⁸Ngajan xi xuta xi siu tahndee ndava cha cojo me xi cavëë rë cha xi casahmi cha caridad ne, cavinenguise xicjin me cuitjin: ―‍¿Hacuiin cha vëhë xi véjña sahmi caridad jan ni? ―‍Cuatjin cavinenguise me xi cuacun jan.

⁹Ngujo me jan ne, cuitjin cachja me: ―‍Juun, hacui cha vë. ―‍Cuatjin cachja me. Hane ngujo nga me ne, cuitjin cachja me: ―‍Cuatjin tsejen, peru hacuiin cha. ―‍Cuatjin cachja me. Hane suvá cha ne, cuitjin cachja cha: ―‍Ngahan vi. ―‍Cuatjin cachja cha.

¹⁰Ngajan xi xuta xi cuacun jan ne, cavinenguise me cha cuitjin: ―‍¿Hacutjin camá xi camandaja túxcun ngayun? ―‍Cuatjin cachja me.

¹¹Ngajan xi cha vëhë ne, cuitjin cafayangui cha: ―‍Me xi hmí rë Jesús ne, casahmi me hitsë ndasi, sehe catsufë me túxcun, sehe cachja me cojo ná xi cjuë́ cuínchacjan nda Siloé. Hane xi cëjë cavinchácjan jan ne, camatsejen ná. ―‍Cuatjin cafayangui cha.

¹²Cavinenguise nga me cha cuitjin: ―‍¿Jani tacun me ni? ―‍Cuatjin cavinenguise me. Hane cha vëhë ne, cuitjin cachja cha: ―‍Hveen. ―‍Cuatjin cachja cha.

¹³Ngajan xi xuta xi cuacun jan ne, quijicojo me cha xi sehe camatsejen rë jan hiscan xi siu cha fariseo.

¹⁴Quihndë ne, nixtin xi casahmi Jesús ndasi hane casahmi me xi camandaja tuxcun cha rcá jan ne, nixtin xi chjahájenda rë.

¹⁵Ngajan xi cha fariseo xi cuacun jan ne, hacuaha cavinenguise cha cha xi camandaja tuxcun jan hacutjin camá xi camatsejen rë cha. Hane cuitjin cafayangui cha: ―‍Ndasi catsufë me túxcun, sehe cëjë cavinchácjan, hane cama camatsejen ná. ―‍Cuatjin cafayangui cha.

¹⁶Hane ngujo cha fariseo xi cuacun jan ne, cuitjin cachja cha: ―‍Me vëhë ne, tsejen xi hacuiin Nina catsingatju rë me, tsëhë xi faharcuaain me nixtin xi chjahájenda rë. ―‍Cuatjin cachja cha. Peru ngujo nga cha ne, cuitjin cachja cha: ―‍Cumaji sahmi me cjuarcun xi cuacun vëhë sa xi ngu cha tsehen me. ―‍Cuatjin cachja cha. Hacuiin ngu tangun ni camá cjua rë cha.

¹⁷Hane ngajan xi cavuya cachja nga cha cojo cha xi camandaja tuxcun jan cuitjin: ―‍Quihndë ta casahmi me xi camandaja tuxcuin ne, ¿mé noje tsëhë me? ―‍Cuatjin cachja cha. Hane cha xi camandaja tuxcun jan ne, cuitjin cafayangui cha: ―‍Ngu profeta me. ―‍Cuatjin cafayangui cha.

¹⁸Peru xutaxa rë yungun jan ne, macjaain rë me xi titjun ne, rcá cha hane quihndë ne, tsejen rë cha. Hisca xi cajindaya me xutacha rë cha xi camandaja tuxcun jan ne,

¹⁹sehe cafahatáha rë me cuitjin: ―‍¿Há cha vihi xi quihndi nuju, cha xi nújun xi ha cuatjin rcá hisca hya xi catsin? ¿Hacutjin camá xi quihndë ne, tsejen rë cha? ―‍Cuatjin cafahatáha me.

²⁰Ngajan xi xutacha rë cha ne, cuitjin cafayangui me: ―‍Hyin xi cha vihi xi quihndi niji cha, hacuaha ha cuatjin rcá cha hisca hya xi catsin cha.

²¹Peru hyíín hacutjin camá xi quihndë ne, tsejen rë cha. Hacuaha hyíín yo xi casahmi xi camandaja tuxcun cha. Chjinengunsun rë cha ta ha jiya nu rë cha. Suvá cha sua nuju cha cjuaquixi rë cha. ―‍Cuatjin cafayangui me.