Yaburina 89:34-52

³⁴Koni n ma hinanna luma nɛn Dawuda xɔn, n mi n ma tinxinyaan kalama.

³⁵N mi n ma layirin kalɛ. N na a tuli saxi naxan na, n mi na maxɛtɛ.

³⁶N bata n kɔlɔ n ma sariɲanni n mi wulen falama Dawuda xa,

³⁷a yixɛtɛne luma nɛn habadan, a mangayaan buma nɛn n yɛtagi alo sogena.

³⁸A buma nɛn mangayani habadan alo kikena, naxan kore xɔnna ma taxamasenna ra waxatin birin.”

³⁹Koni i bata i mɛ a ra, i yi a masiga i ra! I bata xɔlɔ i ya manga sugandixin ma han!

⁴⁰I bata i ya layirin kala i naxan xidi ɛ nun i ya walikɛɛn tagi. I bata a mangaya taxamasenna rabira bɔxɔni.

⁴¹I bata a taan yinne birin nabira. I yi a yire makantanxine findi taa xɔnne ra.

⁴²Dangu muxune birin a muɲama, a dɔxɔ bodene bata a raɲaxu.

⁴³I bata a yɛngɛfane sɛnbɛn gbo ayi. I yi a yaxune birin nasɛwa.

⁴⁴I bata a yɛngɛ so seene sɛnbɛn ɲan. I tondi a maliyɛ yɛngɛni.

⁴⁵I bata a nɔrɔn ba a yii, i yi a mangaya gbɛdɛn nabira bɔxɔni.

⁴⁶I bata a banxulanyaan waxatini kala a ma, i yi a rayagi han!

⁴⁷Alatala, i mɔn i luxunma nɛn nxu ma han waxatin mundun? I ya xɔlɔn luma gbo ayi alo tɛɛna han waxatin mundun?

⁴⁸A xa rabira i ma a n ma siimayaan mi fa xunkuya. I adamadiine birin daxi nɛn tun ba?

⁴⁹Nde luma a faxataren na, a yi a yɛtɛ ratanga sayaan ma?

⁵⁰Marigina, i ya hinanna minɛn, naxan yi na nun, i i kɔlɔ naxan na Dawuda xa i ya tinxinni?

⁵¹Marigina, i miri i ya walikɛne yagin ma, e nun yamaan naxanye birin goron n xun ma.

⁵²Alatala, i yaxune bata nxu rayagi, e biraxi i ya muxu sugandixin fɔxɔ ra yiren birin.