Salmo 89:34-52

³⁴Edtumanen ku is kebpekid-uyun ku kandin, wey is impesarig ku kandin.

³⁵Pinaaǥi te waǥas he ngazan ku nenangdù a ziyà te ki David, ne kenà duwazuwa he edtumanen ku is insaad ku kandin su kenè e man teruen.

³⁶Is kada hadì te Israel ne ziyà ebpuun te menge kevuwazan din taman te taman. Is ginhedian din iring te andew he kenà egkaawà diyà te etuvangan ku.

³⁷Ebpedayun heini taman te taman su iring heini te vulan he egkeseriǥan he tistiǥus diyà te langit.”

³⁸Piru, Nengazen, nepeukan nu is pinilì nu he hadì; mid-iniyuǥan nu sikandin wey mid-engkezan nu.

³⁹Wazè nu leusa te edtuman is kebpekid-uyun nu kandin te suluǥuen nu, ne in-awè nu is gehem te hadì diyà te kandin.

⁴⁰Midlempag nu is menge verengbeng te inged din wey migevè nu is menge kutà kayi.

⁴¹Is menge azen dutun te inged din ne mibpenguwa te menge sumeseǥazà. Mibpeel-elezan sikandin te kesikbit din he menge nasyun.

⁴²Mibeǥayan nu te zesen is menge kuntada zin; midlipey nu sikandan is langun.

⁴³Midhimu nu he wazà pulus te menge ǥumaan din, ne midhimu nu he mezaag sikandin te tebek.

⁴⁴In-awè nu ziyà te kandin is kegkemekeǥeǥehem wey is gehem te hadì.

⁴⁵Henduen be te midtik-ew zà sikandin mebmeǥurang; ne mibpeel-elezan nu sikandin.

⁴⁶Sengemenu keluǥayad is ked-eles nu Nengazen? Taman en be te wazà pidtemanan? Sengemenu keluǥayad is pauk nu he henduen be te hapuy?

⁴⁷Tentenuzi nu Nengazen, he mevavè dà is untung te etew; tentenuzi nu he midhimu nu is etew he zuen din kemetayen.

⁴⁸Hentei is etew he kenà ebpatey? Ebpekelikey ve is etew te kemetayen?

⁴⁹Nengazen, hendei en is gaǥew nu he iring duen te nehuna, he insaad nu ziyà te ki David dengan tenged te kebmetinumanen nu?

⁵⁰Tentenuzi nu, Nengazen, he mibpeel-elezan te menge etew ziyà te mezakel he menge nasyun is menge suluǥuen nu, ne ed-entusen ku heini.

⁵¹Iyan, is menge kuntada nu, Nengazen, edsudì te pinilì nu he hadì minsan hendei sikandin ebayà.

⁵²Dait he edeliǥen is Nengazen te wazà pidtemanan! Amen! Amen!