Yaburina 76:4-12

⁴A a yaxune xalimakunle yigira mɛnna nin, e nun yɛ masansan wure lefane nun e silanfanne nun e yɛngɛ so seene birin.

⁵Ala, i tan nan sɛnbɛn birin kanna ra, i nɔrɔxi dangu habadan geyane ra.

⁶Sofa wɛkilɛxine birin bata bira, e yii seene yi tongo yɛngɛni. E fa saya xixɔnla nin. Na sofa yo mi fa a yiini maxama.

⁷Yaxubaa Ala, i na falan ti xɔlɔni, soone nun soo ragine yi bira, e faxa.

⁸I tan nan magaxu, Ala. I na xɔlɔ, nde nɔɛ tiyɛ i yɛɛ ra.

⁹I to kitisa xuiin namini keli kore, yamanan muxune yi gaxu, e yi e dundu,

¹⁰i to keli kiti bolondeni alogo i xa yiigelitɔne rakisi.

¹¹Hali muxune na xɔlɔ i ma, na raɲanma tantunna nan ma i tan xa. Naxanye na mini i ya xɔlɔn bun, ne xaxili sɔtɔma nɛn.

¹²I na i dɛ ti Alatala xa, i ya Ala, i xa a rakamali. Yamanan naxanye birin be rabilinni, ɛ Alatala ki! A lan birin xa gaxu a yɛɛ ra!